Mirjalol Qosimov: "Nihoyat, tugadi!"

"Nihoyat, tugadi! Bu yilgi chempionatimiz juda qiziqarli o'tdi. Menimcha o'zim futbolchi bo'lganimda ham bunchalik masuliyatli o'yin bo'lmagan. "So'g'diyona"ni va Ulug'bek Baqoevni ikkinchi o'rin bilan tabriklayman. Bugun kimga omad kulib boqqan bo'lsa o'sha yutdi.

Biz uchinchi o'rinni egalladik, bu ham yomon natija emas. Sababi yil boshida tarkibimizni 8 nafar futbolchi tark etgandi. SHunga qaramay juda yaxshi, jangovar jamoa tuza oldik. Osiyo chempionlar ligasi guruh bosqichida ham ishtirok etdik. Bazi futbolchilarimiz uchun bunday nufuzli musobaqadagi ilk ishtirok edi.

Rahbariyatga, yigitlarga birgalikda juda ham qiziqarli mavsumni o'tkazganimiz va shunday kollektiv tuza olganimiz uchun minnatdorchilik bildiraman. Hayot davom etadi. SHogirdlarimdan xursandman, ular bilan g'ururlanaman!", - dedi Qosimov.

- Jamoaga kelganingizga 3 yil bo'ldi. Lekin bu mavsumda ham asosiy muammo himoyada bo'ldi. O'z oldiga yuqori maqsad qo'ygan jamoa uchun balki markazga sifatli himoyachi kerakdir. Aynan himoyachilarning xatolari tufayli ko'plab ochkolar yo'qotildi.
- Bu nafaqat bizda, terma jamoamiz va butun o'zbek futbolining muammosi. Oldingidek Farhod Magametov, Andrey Fyodorov kabi himoyachilar hozir yo'q. Ha, legioner kerak, lekin biz u qadar katta xarajat qila olmaymiz. Legioner olsak ham hujumni kuchaytirish va himoyada o'z futbolchilarimizdan foydalanishga qaror qilgandik. Hozir dabdursutdan qaror chiqarib bo'lmaydi. Buni biroz futboldan chetroq bo'lib o'ylab ko'rish kerak.

- Bugungi hakamlikdan ko'nglingiz to'ldimi?
- Bir narsa borda, biz ham osmondan tushib qolmaganmiz. Insof o'ziga bersin, menga ham, barchamizga insof bersin. Bunday muxlislar O'zbekistonda yo'q, muxlislarni aldab bo'lmaydi. Biz OKMK zavodida og'ir mehnat qiladigan insonlar ishdan keyin kelib xordiq chiqarishlari uchun o'ynaymiz. Hakamlarga baho beradigan insonlar bor, men o'z ishim bilan shug'ullanishim kerak.

- Kubok doirasida "Nasaf" bilan bahsdan keyingi matbuot anjumanida siz emas Xayrulla Karimov ishtirok etgandi. Bugun esa o'zingiz keldingiz. Bu nima bilan bog'liq?
- O'zim bilan bog'liq. CHiqqim kelmadi, shogirdimni yubordim. Negaki haligacha o'zimga kelmadim. Hamma narsani chegarasi bor.