Metrodan chiqqan murabbiy

Har ikki jamoa uchrashuvga oxirgi tayyorgarlikni olib borayotgan bir paytda mehmonlar bosh murabbiyi Mahdi Ali to'g'risida turli qiziqarli malumotlar bilan o'rtoqlashishga qaror qildik. Hozir osiyolik murabbiylar orasida eng katta o'sishga erishganlaridan biri sifatida baholanayotgan Ali aslida hozir Dubay amirligida yuqori lavozimdagi shaxslardan biri bo'lishi ham mumkin edi.

Mahdi Ali futbolchi sifatida yaxshi natijalarga erishgan. U milliy terma jamoa sharafini ham himoya qilgan. Har bir bajarayotgan ishini puxta qilishga o'rgangan Mahdi uchun shu eng muhim bo'lgan. Uning hozirgi muvaffaqiyatlari zamiri ostida aynan o'sha princip turibdi. Dubay amirlik hokimiyatida ishlagan vaqtida u yo'l transport boshqarmasi faoliyatiga ham yordam bergan, shuningdek, Dubay parking (mashinalar qo'nalg'asi) loyihasi va Dubay metrosi chiptalar tizimini ishlab chiqqan. Murabbiy uchun juda hayratlanarli jihatlar, shunday emasmi?



46 yoshli mutaxassis faoliyati turli sohalar orqali shakllangan. SHu bilan birga Mahdi Ali hamisha g'alabalarga erishib kelgan.

“Futbol mening eng yoqtirgan ishim, lekin har qanday ishni bajarishda 100 foiz kuchimni berganman. U murabbiylik bo'ladimi yoki yo'l transport boshqarmasimi, farqi yo'q. Hayotim davomida Dubayga oid turli loyihalarda ishtirok etganman. Murabbiylikni ham turli loyihalar yig'indisiga o'xshatish mumkin. Odamlar bilan kelishib ishlashga o'rganganman, bu esa futbolda menga asqotadi”.

BAA futbolining “oltin avlodi” deb baholanayotgan terma jamoa azolari faoliyati Mahdi Ali nomi bilan chambarchas bog'liq. U yoshlar miqyosidan boshlab muvaffaqiyatlarga erishib kelyapti. Osiyo chempionligi, keyinchalik jahon chempionatida chorak final, Osiyo o'yinlarida ikkinchi o'rin, “Ko'rfaz Kubogi”dagi chempionlik buni isbotlab turibdi.
“Ushbu futbolchilar bilan deyarli o'n yilda beri birgaman va o'yinchilarning imkoniyatini yaxshi bilaman. Bu esa menga katta yordam beradi”.

Ali 2003 yil BAA o'smirlar terma jamoasi murabbiyi etib tayinlangandi. Murabbiylik faoliyatini Mahdi 1998 yil boshlagan. O'shanda u Dubayning “Al Ahli” klubida 10 yoshli bolalar bilan ishlashga kirishgandi. Ali jamoa rahbariyatining menejer yoki rahbarlik lavozimlaridan birida faoliyat olib borish taklifini rad etib, mamuriy lavozimda ishlay olmasligini bildirgandi. U hamisha to'p bilan ishlash jarayonida birga bo'lishni xohlagan. Quyi tizimdan ish boshlagan Ali milliy terma jamoa bosh murabbiyi darajasiga ko'tarildi. 2000 yil Londonda murabbiylik sertifikatini qo'lga kiritgan Mahdi keyinchalik Germaniyada “A” licenziyasi uchun tahsil oldi. 2008 yil esa unga yoshlar terma jamoasini boshqarish taklifi bilan BAA FA murojaat qildi. Bu paytda Ali Dubay amirligi hukumatida ishlardi. O'sha paytda u tatilda bo'lgani sababli associaciya taklifini qabul qilgandi. CHunki butun vaqtini ishga bag'ishlash imkoniyati yuzaga kelgani sababli bunga rozilik bildirgan.



Yoshlar termasi bilan Osiyo chempioni bo'lgach, Ali jamoani boshqarishda davom etishiga ruxsat berishi uchun Dubay amiri SHayx Muhammad Bin Rashidga murojaat qilgan. Misrdagi mundialda jamoa bilan chorak finalga etib borgach, unga murabbiylik faoliyatini davom ettirishiga ruxsat berishgan. Agar voqealar jarayoni sal boshqacharoq ko'rinish olsa, bugun biz bu murabbiyni bilmasdik va BAA terma jamoasi bu qadar katta o'sishga erishmagan bo'lardi. CHunki ungacha ishlagan mashhur murabbiylar aytarli natijalarni qo'lga kiritishmagan. Ali esa yoshlarni milliy termaga jalb qilib, jamoaviy o'yinni yangi saviyaga olib chiqdi. Olimpiya terma jamoasini Londondagi Olimpiada o'yinlariga boshlab bordi. SHu o'rinda murabbiydagi intilish va professionallikka qoyil qolish kerak. Barcha ham hukumatda egallab turgan lavozimidan keyin murabbiylik ishiga qaytib, tavakkal qilishni istamaydi. G'alabalarga erishish esa umuman boshqa masala. Lekin Mahdi Ali barchasini uddalay oldi. BAA terma jamoasi so'nggi yillardagi eng chiroyli o'yinini namoyish etib, FIFA reytingida yuqoriladi.

“Men futbolchi sifatida hamisha xalqaro uchrashuvlarda o'ynashni istaganman. Biroq jarohat tufayli faqat o'rtoqlik o'yinlarida ishtirok etganman. O'shanda bundan rosa afsuslanganman. Lekin endi yuqori natijalarga murabbiy sifatida erishishni xohlayman. 1990 yil BAA terma jamoasi jahon chempionatida qatnashgan. O'shanda umumiy tarkibda bo'lgandim, ammo jamoa Italiyaga jo'nab ketishidan bir hafta avval jarohat sababli safdan chiqqanman”.

Mahdi Ali “Al Ahli” tarkibida ikki marta Prezident Kubogini qo'lga kiritgan. 1988 yilgi finalda “Al SHabab” mag'lub etilishida asosiy rolni o'ynagan. Uning jamoasi 10 futbolchi bilan qolgan paytda u ikki to'p kiritib, bir bor golli pas oshirgan. Natijada “Ahli” 3:2 hisobida g'alaba qozongan. Lekin aynan o'sha finalda maydonga tushgani sababli Al Ayn Universitetida imtihonlarini o'tkazib yuborgan. Ularda past ball to'plagani uchun Dubay hokimiyatida oddiy xizmatchi sifatida ishlashga kirishgan. Lekin ishidan qoniqmagani tufayli bir yildan so'ng yana o'qishni boshlagan. Bu safar Dubay texnologiya kollejini elektr injener mutaxassisi sifatida tamomlagan. Keyinchalik yana hokimiyatga ishga qaytgan Mahdi bir qator loyihalarni muvaffaqiyatli amalga oshirgan. Murabbiylik ishiga qaytishi qanday sodir bo'lgani to'g'risida to'xtalib o'tdik. Klublardan “Baniyas”da vaqtincha faoliyat ko'rsatib, klubni kumush medallar sari etaklagan. O'sha paytda olimpiya terma jamoasiga nomzod 6 futbolchi bilan “Baniyas”da ham ishlagani keyinroq unga terma jamoadagi faoliyatida asqotdi. Mahdi Ali o'smirlar, yoshlar, olimpiya va milliy terma jamoada ishlashga ulgurdi. Inqirozga tushib qolgandek ko'ringan BAA terma jamoasini Osiyodagi etakchi termalar safiga qaytargan Alining maqsadi Osiyo Kubogida yaxshi natijaga erishib, jahon chempionati final bosqichiga chiqish uchun kurashishdan iborat.



Biz ushbu mutaxassis faoliyatini boshqalarga ibrat bo'lishi uchun yoritib o'tdik. Yani, qaysidir lahzada biror insonga bildirilgan ishonch keyin katta g'alabalarga olib kelishi mumkin. Faqat futbolda emas, barcha sohalarda.


Behzod NAZAROV.