“Metallurg” “Neftchi”ga qarshi o'yinga tayyorgarlikni boshladi

15-turda bekobodliklar safarda mamlakatimizning eng nomdor klublaridan biri, besh karra O'zbekiston chempioni – Farg'onaning “Neftchi” jamoasiga qarshi o'tkazadi.

Ayni paytda “Metallurg”ning barcha o'yinchilari mashg'ulotlarda qatnashayapti. “Bunyodkor” bilan uchrashuvning 35-daqiqasida tirsagidan jarohat olgan Ayubxon No'monov individual tarzda shug'ullanmoqda. Uning “Neftchi”ga qarshi o'yinga qadar tayyor bo'lishi aniq emas. “Lokomotiv” bilan o'yinning birinchi bo'limidayoq almashtirilgan Jahongir Abdumo'minovning esa holati ancha yaxshi. Jamoadagi qolgan barcha futbolchilarning salomatligi joyida.

SHu o'rinda “Neftchi” “Metallurg” uchun o'ta noqulay raqiblardan biri desak mubolag'a bo'lmaydi. Mazkur jamoalar milliy chempionatlarimiz doirasida bugungacha 36 ta uchrashuv o'tkazish bo'lishsa, shulardan 22 tasi vodiyliklarning g'alabasi bilan yakunlangan. 8 ta o'yinda durang natija qayd etilgan. Faqatgina 6 o'yinda omad bekobodliklar tomonida bo'lgan. Mazkur g'alabalardan bittasini “Metallurg” safarda qo'lga kiritgan. Bu 2013 yilgi mavsumda sodir bo'lib, o'yinning 80-daqiqasida Sunnatilla Mamadaliev tomonidan kiritilgan yagona gol uchrashuv taqdirini hal etgandi. O'tgan mavsum esa har ikkala o'yinda farg'onaliklar zafar quchishgan.

Bu yilgi dastlabki to'qnashuvni “Neftchi” himoyachisi Dilyorbek Ermatov sariq kartochkalari to'planib qolganligi bois o'tkazib yuborishi malum bo'ldi. O'yinni esa poytaxtlik tajribali hakam Vladislav Ceytlin boshqarib boradi.

15-tur, 1 iyul

Neftchi (Farg'ona) – Metallurg (Bekobod)
Hakamlar: V. Ceytlin (Toshkent), A. Kalinin (Qarshi), S. SHoyusupov (Toshkent), A. Rubakov (Toshkent)
Nazoratchi: A. Popov (Toshkent).

"Metallurg" matbuot xizmati