"Metallurg" mashg'ulotlarga kirishdi

Yangi mavsum uchun ilk yig'in klub qarorgohida olib borilyapti. Futbolchilar kunning birinchi yarmida trenajyor zalida shug'ullanishmoqda. Tushlikdan so'ng esa mashg'ulotlar "Metallurg" stadioniga ko'chayapti va unda asosiy etibor futbolchilarning jismoniy tayyorgarligini tiklashga qaratilyapti. Mashg'ulotlarni bosh murabbiy ko'rsatmalari asosida "Metallurg"ning mahalliy murabbiylari olib borishyapti.

Luisma Ernandes boshchiligidagi xorijlik murabbiylar esa klub ixtiyoriga yangi yildan keyin kelib qo'shilishadi. Jamoaning o'tgan yilgi o'zagi saqlab qolingan. Ilgari xabar berganimizdek, shartnoma muddati tugagan Abbos Otaxonov, Jasur Xolto'raev, Boburbek Farhodov bilan iliq xayrlashildi. Ayni kunlarda aksariyat o'yinchilar bilan shartnoma muddatini uzaytirish borasidagi ishlar davom ettirilyapti. Xususan, Kerim Palich bilan yana bir yillik shartnoma imzolandi. SHu o'rinda qayd etish kerak, bu yil jamoamizda xorijlik futbolchilar safi kengayishi kutilyapti. Ko'hna qitaning Bolqonbo'yi mamlakatlaridan va yaqin qo'shni davlatlarning tajribali futbolchilari bilan muzokaralar olib borilmoqda. Bundan tashqari, selekcionerlarning say-harakatlari tufayli ko'plab iqtidorli yoshlar hamda tajribali mahalliy futbolchilar ham ko'rikka taklif etilgan. Ulardan kimlar bilan shartnoma imzolanishi ikkinchi yig'indan keyin malum bo'ladi.

SHu o'rinda, ikkinchi yig'in yanvar oyining birinchi o'n kunligida yana Bekobodda tashkil etilishini qayd etib o'tamiz. Klub rejasiga binoan Bekobodda hamda Toshkentda bir qator nazorat uchrashuvlari o'tkazilishi rejalashtirilgan.