Mbappe munosib edimi?

Kech bo'lsada munosabat bildirgim keldi. Aslida hammasi joyida birov ekkanini boshqa birisi o'rib ketmayapti. Messi “The Best” sovrinini haqli ravishda qo'lga kiritdi. Hammasi 2016 yili FIFA va “France Football”ning yo'llari ayro tushganidan boshlangan. O'shandan boshlab “France Football” o'zining “Oltin to'p”ini, FIFA esa “The Best”ini yilning eng yaxshi futbolchilariga topshirishni boshladi. Tabiiyki yilning eng yaxshisini aniqlashda ikki tomon doim ham bir xil natija qayd etishmaydi. Munozaralarning kelib chiqishi ham shundan aslida. Quyida 2016 yildan buyon “The Best” va “Oltin to'p”ni qo'lga kiritgan futbolchilarga etibor qaratamiz.

  Ko'rib turibsizki, so'nggi 3 yilda sovrinlarni turli futbolchilar olishgan. “France Football” 2020 yilda pandemiya sabab marosim o'tkazmagan bo'lsa, FIFA polshalik futbolchiga eng yaxshi futbolchi maqomini berdi. 2021 yilda “Oltin to'p” munozarali tarzda Leo Messiga topshirildi, FIFA esa Robertni ketma-ket ikkinchi bor taqdirladi. “France Football” aynan shu joyda xatoga yo'l qo'ydi, keyinchalik Messining o'zi ham buni takidlagandi. 2022 yilda Benzema “Oltin to'p” sovriniga munosib ko'rildi (haqli), FIFA esa kuni kecha 4 yillikning eng katta musobaqasida asosiy qahramonga aylangan Leo Messini eng yaxshi deb topdi. Oldingilaridan farqli bu safar FIFA ham “France Football” ham adolatli qaror chiqardi.

Mbappe munosib edimi?

Fikrlar subektiv, hammaning o'z qarashlari bor. JCH finalchilari va o'z jamoalarining liderlari bo'lgan ikki futbolchi o'zaro taqqos qilinganda titul yuqori planga chiqadi. CHempion Argentina bo'ldi va argentinaliklar FIFA tomonidan eng yaxshilari deb topilishdi. Agarda chempion tarkibida Messi kabi persona bo'lmaganda deylik Di Mariya, FIFA taxminimcha Kilian variantida to'xtalardi. 2018 yilgi mundial finalchisi Luka Modrich o'sha yili “Oltin to'p”ga ham “The Best”ga ham munosib ko'rilgandi (Ronaldudan “Oltin to'p” o'g'irlandi deydiganlar ham bo'lgan). Bu erda hammasini Messi faktori hal qildi, ortiqcha izohga hojat yo'q.

Intriga.

Buyog'iga «FIFA» va “France Football” o'rtasidagi raqobat davom etadi. Oldinlari “Oltin to'p” sovrini “The Best”dan zalvorliroq edi, endi esa tafovut ancha qisqargan. Bu borada ham har kimning o'z qarashlari bor.

Jaloliddin Xalilov.