May oyi laureatlari o'z sovrinlarini qabul qilib olishdi
14 iyu 2018 15:47
Yangiliklar

May oyi laureatlari o'z sovrinlarini qabul qilib olishdi

Professional futbol ligasi hamda Championat.asia nashri hamkorligida o'tkazilayotgan oyning eng yaxshilarini aniqlash so'rovnomasining may oyi g'oliblari aniqlanganidan xabaringiz bor.

May oyining eng yaxshisi deb topilgan barcha murabbiy hamda futbolchilar o'z sovrinlarini qabul qilib olishdi. Jumladan Superliga 15-tur uchrashuvlari doirasidan o'rin olgan “Buxoro” – “Bunyodkor” bahsi boshlanishi oldidan o'tgan oyning eng chiroyli goliga mualliflik qilgan Arslonmurod Omonov hamda may oyining eng yaxshi murabbiyi sifatida tan olingan Mirjalol Qosimovga esdalik sovrinlari topshirildi. SHuningdek, “Navbahor” – “Qo'qon-1912” o'yinida Botirali Ergashev ham oyining eng yaxshi darvozaboniga beriladigan sovrinni qabul qilib oldi.

Jarohat sababli “Buxoro” – “Bunyodkor” uchrashuvida ishtirok eta olmagan Sardor Sobirxo'jaev esa bugun PFL binosiga tashrif buyurdi va unga may oyining eng yaxshi futbolchisi sovrini topshirildi.