Markazobod - Futbolimiz kelajagi turniri g'olibi

Mahalla yoshlarining bo'sh vaqtini mazmunli tashkil etish, ular o'rtasida futbolni yanada ommalashtirish, iqtidorli yoshlarni qo'llab-quvvatlash maqsadida uyushtirilgan musobaqa uch yosh toifasida – 9-10, 11-12 va 13-14 yoshli bolalardan iborat jamoalar o'rtasida o'tkazildi. Unda mamlakatimizning barcha hududlaridan futbol jamoalari g'oliblik uchun maydonga tushdi.

9-10 yoshli bolalar o'rtasida Bog'dod tumanidagi Samarqand mahallasi jamoasi birinchi, Buxoro shahridagi Ashfor mahallasi jamoasi ikkinchi, Jomboy tumani Alisher Navoiy nomidagi mahalla jamoasi uchinchi o'rinni egalladi.

11-12 yoshlilar o'rtasidagi bahslarda To'rtko'l tumanidagi Markazobod mahallasi jamoasi bosh sovrinni qo'lga kiritdi. Pastdarg'om tumanidagi Sinchi mahallasi jamoasiga ikkinchi, Jizzax tumanidagi Ziyokor mahallasi jamoasiga uchinchi o'rin nasib etdi.

13-14 yoshli futbolchilar o'rtasidagi uchrashuvlarda Sariosiyo tumanidagi Gulobod mahallasi, Jizzax tumanidagi Qatortol mahallasi va Namangan shahridagi Umid maµallasi jamoalari g'oliblikni qo'lga kiritdi.

- Mahallamizda uch mingga yaqin aholi yashaydi, - deydi To'rtko'l tumanidagi Markazobod mahallasi faollaridan biri Ulug'bek Husayniy. - Ularning asosiy qismini yoshlar tashkil etadi.  Mahallamizda yoshlarga sport bilan shug'ullanish uchun barcha zarur sharoit yaratilgan. Bu esa ularning bo'sh vaqtlarini mazmunli o'tkazishlarida juda qo'l kelayotir. To'rt yildirki, mahallamiz yosh futbolchilari mazkur turnirning final bosqichida muntazam ishtirok etib kelmoqda. Yosh futbolchilarimiz bu yilgi turnirda bosh sovrinni qo'lga kiritib, mahallamiz nomini butun mamlakatimizga tanitganidan juda xursandmiz. Bu yutuq kelajakda mahallamiz farzandlarining jismoniy tarbiya va sportga bґlgan qiziqishlarini yanada oshirishi shubhasiz.

Suratda: turnir g'olibi - Markazobod mahallasi yosh futbolchilari.