Marchello Lippi: “Biz OCHL g'olibiga aylanish uchun etarli ishni amalga oshirdik”

Yong SU CHOY (“Seul” FK bosh murabbiyi): - Birinchi bo'limda raqibga ko'plab imkoniyatlarni taqdim etdik, lekin tenglikni saqlab qoldik. Ikkinchi bo'limda esa raqibning hujumdagi legionerlari xavfli vaziyatlarni yuzaga keltirishdi va gol urishdi. Biz darhol bunga javob qaytardik. SHundan keyin yana imkoniyatlar bo'ldi, biroq bazi mayda xatolar umumiy g'alabaga kamlik qildi. Turnirdagi ilk o'yinimizni o'tkazganimizdan buyon futbolchilar faqat oldinga qarab yurishdi. Bir necha bor g'alabalardan quvondik, biroq futbolda faqatgina chempionlik quvonish uchun asosiy sabab bo'la oladi. Biz esa bunga erishmadik. SHu sababli qalbimizda g'amginlik sezyapmiz. Lekin bu futbol.

Marchello LIPPI (“Guanchjou Evergrand” bosh murabbiyi): - Barchasi rejamiz bo'yicha ketdi. Tanaffusgacha ustunlikni hisobda aks ettirmadik. Ikkinchi bo'limda Muriki va Elkeson ko'plab vaziyatlarga ega bo'lishdi. Hisob ochganimizdan keyin tezda gol o'tkazib yubordik va bu yog'iga barchasi 50ga 50 bo'lib qolgandi. Yana bir gol bizga qimmatga tushishi mumkin edi. Lekin barchasi biz uchun yaxshi yakun topdi va musobaqada g'olib chiqdik. Menimcha, biz OCHL g'olibiga aylanish uchun etarli ishni amalga oshirdik. Bunga arziydigan o'yin namoyish qildik. Nimchorak, chorak va yarim finalda raqiblarni uyda va mehmonda dog'da qoldirdik. Finalda ham har 2 o'yinda yaxshiroq harakat qildik. UEFA CHempionlar ligasida “Milan” 2003 yil qatorasiga 3 bahsda durangga erishib, g'olib bo'lgandi. Bu yil Osiyo jamoalari orasida sovringa eng munosibi bizning jamoa edi.


Behzod NAZAROV.