Maqsudovdan nega istefo so'rashdi?

Timur Kapadze shogirdlari Superligadagi birinchi g'alabasini qo'lga kiritdi. Muhtasham arenaga yig'ilgan muxlislar esa "qaldirg'ochlar" ustozi SHuhrat Maqsudovdan istefo so'rab, uning o'rnini Viktor Karpenko egallashini talab qilishdi. 

Albatta, sharmandali mag'lubiyat. "Bunyodkor" o'z maydonida tarixda ilk bor 5 ta to'p o'tkazib yubordi. Ammo, masalaning 2-tomoni ham bor.

Murabbiy o'tgan mavsum oxirida ("Paxtakor" bilan o'yindan keyin) matbuot anjumanida ishtirok etib, jamoa ishqibozlarini kamsitgan edi: "Bosh homiymiz, xususan, Mehriddin Razzoqovichga minnatdorchilik bildirmoqchiman. Yuzta muxlisdan birgina mana shunday inson bo'lgani yaxshi".

Bu gap jamoaning haqiqiy ishqibozlarini xafa qilgani aniq. SHu tufayli ular Maqsudovning xatolarini hazm qila olishmayapti.

Biroz avval o'tkazilgan matbuot anjumanida shunday fikr yangradi: "Ishga qo'yish yoki istefoga chiqarish muxlislarning ishi emas". 

Bu o'rtadagi toqatsizlikni yanada kuchaytirishi mumkin. Agar keyingi o'yinlarda ham shunday hayqiriqlar eshitishni xohlamasa, jamoa rahbariyati va murabbiy ertagayoq klub muxlislari bilan uchrashuv tashkil qilib, murosa ko'chasini topishi kerak. Aks holda, jamoatchilik "Bunyodkor"ning rostan ham muxlislar uchun emas, bosh homiy uchun o'ynashiga ishonib qoladi. 

Muallifning boshqa fikrlarini kuzatish uchun telegram-kanalga azo bo'lishni unutmang.