Manjukich futbolchilik faoliyatini yakunlaganini elon qildi hamda o'ziga maktub yozdi

Bu haqda 35 yoshli xorvatiyalik futbolchi o'zining instagramdagi sahifasida maktub tarzida malum qildi. Forvard postga ilk bor kiygan butsalarining rasmini ilova qildi.

"Qadrdon jajji Mario!

Ushbu butsalarni ilk bor kiyganingda, futbolda seni nimalar kutayotganini tasavvur ham qila olmasding. Sen katta turnirlarda gol urasan va jahon futboli gigantlari bilan eng katta sovrinlarni qo'lga kiritasan. O'z millatingni g'urur bilan ifoda etib, Xorvatiya sportining tarixini yozishga yordam berasan.

Sen muvaffaqiyat qozonasan, chunki atrofingda yaxshi odamlar bor — jamoadoshlar, murabbiylar, muxlislar va oilang, agenting hamda do'stlaring. Ularning barchasidan cheksiz minnatdor bo'lasan!

Birinchidan, sen muvaffaqiyat qozonasan, chunki har doim qo'lingdan kelganicha harakat qilasan. Oxir-oqibat, bu o'zing faxrlanadigan hodisaga aylanadi. Sen ko'p narsani qurbon qilasan, lekin bularning barchasi maydondagi esda qolarli lahzalar tufayli bunga arzigulik ekanligini bilasan.

Keyin faoliyatingni yakunlash, butsalaringni mixga ilish vaqti kelganini his qilasan va bu qaroringdan pushaymon bo'lmaysan. Futbol har doim hayotingni bir qismi bo'lib qoladi, lekin oldinda yangi sahifa ochiladi.

Hayotdan rohatlan!

Sening katta Marioing.

P. S.  Agar jahon chempionatida Angliyaga qarshi o'ynasang, 109-daqiqaga qadar tayyor bo'l", — deb yozdi Manjukich.

View this post on Instagram

A post shared by Mario Mandžukić MM 9 (@mariomandzukic)

Eslatib o'tamiz, xorvatiyalik futbolchi "Bavariya" bilan ikki marta Germaniya chempioni, ikki marta Germaniya kubogini qo'lga kiritdi va CHempionlar ligasi, UEFA Superkubogi, klublar o'rtasidagi jahon chempionati va Germaniya superkubogi sohibi bo'ldi.

"Yuventus"da u A Seriyani besh marta, Italiya kubogini uch marta hamda ikki marta mamlakat Superkubogini qo'lga kiritdi. "Atletiko"da forvard Ispaniya kubogini qo'lga kiritdi.

Manjukich 2018 yilda Xorvatiya terma jamoasi tarkibida jahon chempionatida ikkinchi o'rinni egalladi. Bundan tashqari, Mario ikki marta mamlakatning eng yaxshi futbolchisi deb topilgan.