"Manchester Siti" - "Tottenxem": "shaharliklar" noxush seriyaga chek qo'yishadimi?

Engilmas "Manchester Siti" o'z uyida "to'rttalik"da ketayotgan "Tottenxem"ni mehmon qiladi.

"Etihad" stediumda Xosep Gvardiola hamda Mauricio Pochettino qarama-qarshligiga guvoh bo'lamiz.

Joriy mavsumda "Manchester Siti" premer ligada yakka hokimlikni o'rnatgan. "SHaharliklar" hali birorta mag'lubiyatga uchramasdan turnir jadvalida peshqadamlik qilishmoqda.

"SHporlar" esa joriy mavsumda ichki chempionatda kutilganidek muvaffaqiyatli o'ynay olishmayapti. Garchi jamoa "kuchli to'rttalik"da ketayotgan bo'lsada, chempionlik uchun kurashdan allaqachon chiqib ketishgan. Lekin bu faktorlarni bugungi bahsga hech qanday aloqasi yo'q. Har qanday holatda ham "Tottenxem" turnir jadvalidagi o'z mavqeini yaxshilab olish uchun kurashadi. "Siti" esa mag'lubiyatsiz seriyani davom ettirish bilan birgalikda birinchi davrani ko'tarinki ruhda tugatish ishtiyoqida.

SHuni alohida qayd etish kerakki, Pep hali Mauricio Pochettinoni rasmiy o'yinlarda mag'lubiyatga uchrata olmagan.
O'tgan yilgi mavsumda bu jamoalar o'rtasidagi o'yinlarning birida "Tottenxem"ning qo'li baland kelgan bo'lsa, "Etihad"da o'tgan to'qnashuvda g'olib nomi aniqlanmagandi.

Faqatgina joriy mavsum boshlanishi arafasida o'tkazilgan o'rtoqlik turniridagi bellashuvda "Siti" "Tottenxem" ustidan zafar quchdi.

Demak Pep bugun Pochettino bilan o'zining shaxsiy hisob-kitobini joyiga qo'yishga qasdlangan.

"Manchester Siti" premer ligada so'nggi bor "Tottenxem"ni 2015 yil, 3 may kuni mag'lub etgandi. SHundan so'ng ketma-ket ikki mavsumdan buyon "Tottenxem" "Siti"ga yutqazmay kelmoqda.

O'zaro o'yinlar tarixidan:
Bu jamoalar jami 154 marotaba to'qnash kelishgan. "Tottenxem" 60 bor g'alaba qozongan bo'lsa, "Siti" 59 marta "shporlar"dan ustun kelgan. Qolgan 35 o'yinda esa durang qayd etilgan.

Bugun "Manchester Siti" o'zaro uchrashuvlardagi g'alabalar soni bo'yicha "Tottenxem"ga etib olishi mumkin.

"Manchester Siti" to'purari: Serxio Aguero (10 gol)

"Tottenxem" to'purari: Xarri Keyn (12 gol)

APL, 18-tur.
"Manchester Siti" - "Tottenxem" (22:30)
"Etihad" stedium.
Bosh hakam: Kreyg Pavson.