Mahsudjon Hayitov: "Hisob o'yinga mos bo'lmadi"

O'yindan keyin mezbonlar azosi Mahsudjon Hayitovning fikrlari bilan qiziqdik.

- Bilasiz, oliy liga bilan birinchi liganing saviyasida katta farq bor. Kechagi uchrashuvda shu jihat o'z so'zini aytdi. Biz raqib darvozasi oldida yaratgan vaziyatlarimizdan foydalana olmadik. Aksincha, mehmonlar darvozamizni uch bor ishg'ol qilishdi. Xolis aytganda, hisob o'yinga mos bo'lmadi. Mag'lubiyatga emas, hisobga xafa bo'ldik. "Metallurg" yaqqol tajriba evaziga g'alaba qozonib ketdi.

Oliy liga klublari dekabr oyida tayyorgarlikni boshlagan. Qolaversa, chempionatda 2ta uchrashuv o'tkazishga ulgurishdi. "Metallurg" 2ta g'alaba bilan peshqadamlar safida yurganining o'ziyoq nimadandir darak bermoqda. Biz esa, fevraldan yig'inga kirishdik. Bu birinchi rasmiy o'yinimiz edi. O'rtoqlik uchrashuvi bilan rasmiy bahs o'rtasida katta farq bor. Ochig'i, biz hali 100 foiz tayyor emasmiz. Birinchi liga o'yinlari start olganidan keyin mavsumga to'liq tayyor bo'lamiz, desam mubolag'a bo'lmaydi.

Garchi kecha yutqazgan bo'lsak-da, chempionatda muxlislarimizni xursand qilishimizga ishonaman. Boisi, bizda yaxshi jamoa shakllanyapti. Klub rahbarlari barcha sharoitlarni yaratib bermoqda. Rosti, "Xotira-79" yangi mavsumda oliy liga uchun kurash olib bormasada, kurashadigan etakchilarga bemalol bosh og'riq bo'la oladi. Buni ishontirib ayta olaman, - deydi Hayitov.