"Lokomotiv" nazorat uchrashuvida "NBU-Osiyo"ni mag'lub etdi

Yuzaga kelgan 17 kunlik tanaffusda futbolchilar o'yin amaliyotiga ega bo'lishi va sport formasini yaxshi darajada saqlab turishi maqsadida o'tkazilgan yana bir nazorat uchrashuvida Vadim Abramov asosiy tarkibning deyarli barcha azosini sinab ko'rdi.

Uchrashuvda “Lokomotiv” katta ustunlikka ega bo'lgan bo'lsa-da, “NBU-Osiyo” futbolchilari o'zlari yaratgan kam sonli hujumlarini muvaffaqiyatli yakunlay olishdi.

O'yinning 16-daqiqasida qarshi hujumdan keyin yaxshi vaziyatga chiqib borgan tajribali Leonid Koshelev Temur Jo'raev qo'riqlayotgan darvozani aniq nishonga oldi. “Lokomotiv”da birinchi bo'lim davomida juda ko'plab yaxshi vaziyatlar bo'ldi. Biroq hisobni tenglashtirish nasib etmadi. Ikkinchi bo'lim avvalida yana o'sha Koshelev hisobni 2:0ga etkazganidan so'ng “temir yo'lchilar” hujumga zo'r berdi va ko'p o'tmay, o'yinning 55-daqiqasida Akmal Holmatov hisobdagi farqni bittaga qisqartirdi.

Birozdan so'ng chap qanotdan hujum uyushtirgan Jasur Hasanov (kichigi) o'zining bilyardchilarga xos aniq zarbasi bilan hisobni tenglashtirdi.

Butun o'yin davomida juda faol o'yin namoyish etgan Farhod Tojiev esa o'yin so'nggida dubl qayd etdi. O'zining birinchi golining o'ng qondan uzatilgan to'pni boshi bilan kiritganida o'yinning 85-daqiqasi o'tib borayotgan edi. Hakam o'yin tugagani haqidagi xushtagini chalishidan biroz avval esa u yana bir bor o'z nomiga gol yozib qo'yishga ulgurdi – 4:2.

O'rtoqlik uchrashuvi.

“Lokomotiv” – “NBU-Osiyo” 4:2

Gollar: Akmal Xolmatov (55), Jasur Xasanov (62), Farhod Tojiev (85, 90) - Leonid Koshelev (16, 48).