"Lochinlar" "Yozyovon-Lochinlari"ni taslim qildi

"Navbahor"ning Namanganda tashkil etilgan yig'ini yakunlandi. Yig'in so'nggida futbolchilar birinchi liga vakili “Yozyovon Lochinlar” jamoasi bilan nazorat o'yinida kuch sinashishdi. Uchrashuvning birinchi bo'limida mezbonlar hisobni ochish uchun bir qator imkoniyatlarga ega bo'lishdi. O'z navbatida mehmonlarda ham gol urish uchun yaxshigina imkoniyatlar yuzaga keldi. SHunday bo'lsada, muxlislar 33-daqiqaga kelibgina dastlabki golga guvoh bo'lishdi. Oybek Qilichev belgilangan jarima zarbasini aniq amalga oshirib, hisobni ochdi. Goldan keyin ham jamoa hisobni o'zgartirish uchun imkoniyatlarga ega bo'lishsada, tanaffusga qadar hisob o'zgarishsiz qoldi.

Tanaffusdan keyin futbolchilar ustunlikni o'z qo'llarida saqlab turishdi. Bu hol uchrashuvni yirik hisobda yakun topishiga zamin yaratdi. Avvaliga 56-daqiqada Nemanya Yovanovich burchakdan oshirilgan to'pni boshi bilan darvozaga aniq yo'llab hisobni 2:0 ko'rinishiga keltirib qo'ydi. O'yinning 82-daqiqasida Doniyor Usmonov chap qanotdan jarima maydonchasiga yorib kirdi va o'tkir burchak ostidan aniq zarba yo'llab, uchinchi golga mualliflik qildi. Aynan shu hisob hakamning final xushtagi chalingunga qadar o'zgarishsiz qoldi.

"Navbahor" uchrashuvni quyidagi tarkibda o'tkazdi: Asilbek Amanov, Abbos Otaxonov, Jahongir Mehmonov, G'iyos Komilov, Mirzohid G'ofurov, Abbos Maxstaliev, Dilshod Jabborov, Azam Aliev, Azizbek Turg'unboev, Oybek Qilichev, Nemanya Yovanovich.

Zaxiradan maydonga tushganlar: Dilshod Hamroev, Doniyor Usmonov, Oston O'runov, Ro'zimboy Ahmedov, Ilhom Boydedaev, Ravshan Xursanov, Saidjon Abdujabborov.

Jamoa azolari ertaga Toshkent sari yo'lga otlanishadi. Kechki payt futbolchilar engil mashg'ulot o'tkazishadi. 31 iyul kuni esa murabbiy va futbolchilar tibbiy ko'rikdan o'tishadi.