Kojo Joel: "2019 yil "Navbahor"dan taklif bo'lgan, hozir "Dinamo"da ekanligimdan baxtliman"

Vadim Abramov shogirdlari o'tgan turda "Xorazm" mehmoni bo'lishdi. Aftidan uchrashuv durangga qarab ketayotgan bir pallada allaqachon ko'pchilikning etiboriga tushib bo'lgan Kojo Joel katta sahnaga chiqib keldi. So'nggi daqiqada u jarima zarbasini golga aylantirdi. Pro ligada bu mavsum 6 golini urgan ganalik forvard to'purarlar poygasida birinchi o'ringa chiqib oldi. "Xorazm" bilan uchrashuvdan so'ng Kojoning fikrlari bilan qiziqdik. 

- Dastlab "Xorazm" bilan o'yin taassurotlaringiz?

- Muhimi g'alabaga erishdik. Jarima zarbasi mening qurollarimdan biri. Lekin jamoadoshlarim zarbani amalga oshirishni istasa, ularga qarshilik ko'rsatmayman. Sababi mashg'ulotlarda ularning ijrochilik mahoratini ko'rganman. Biroq o'yin vaqtida bu ish bermadi. SHu sababdan to'pni o'zim tepishga qaror qildim. 

- O'sha vaziyatda golga aylanishiga ishondingizmi?

- Jamoadagilar menga ishonishlari yoki aksincha ishonmasliklari mumkin. Ammo men doim o'zimga ishonaman. 

- Siz Qirg'iziston chempionatida tupo'rar bo'lgan edingiz(26ta gol). Hozirgi vaqtda hisobingizda 6ta gol bor. Pro liga jamoalarining kuchini ko'rdingiz. Tupo'rar bo'lishingiz uchun nechta gol urishingiz etarli bo'ladi?

- Qirg'izistonda eng yaxshi to'purar bo'lish men bajara oladigan yagona qobiliyat emas. Aslida bu xudo tomonidan berilgan nemat hisoblanadi. 

- O'zbek klublari qo'shni mamlakat chempionatlarini kuzatib borishadi va o'zini ko'rsatgan futbolchilarga taklif bilan chiqishadi. Sizga O'zbekistondan avval ham chorlov bo'lganmi yoki "Dinamo" bu borada birinchi bo'ldimi?

- 2019 yil "Navbahor"dan takliflar bo'lgan. "Dinamo"dan ham o'tgan mavsumlarda chorlovlar kelgan. Lekin jamoam meni qo'yib yuborishni istamagan edi. Hozir bu erda ekanligimdan baxtliman.