Kepa: "Katta xatoga yo'l qo'ydim, murabbiydan kechirim so'rayman

Bahs yakunlanishiga bir necha daqiqa qolganida bosh murabbiy Mauricio Sarri Arrisabalaga o'rniga Villi Kabaleroni tushirmoqchi bo'ldi, ammo tablo ko'tarilganiga qaramay, Kepa maydonni tark etishni istamadi. Natijada italiyalik mutaxassis g'azab bilan suv idishni erga otdi va tribunaosti yo'lakchasiga yo'l oldi. Bir necha soniya o'tib murabbiy maydonga qaytdi. Penaltilar seriyasida "Manchester Siti" g'alabaga erishdi.

"Kecha "CHelsi" safida birinchi finalda ishtirok etganimdan xursand edim va jamoamning o'yinidan faxrlanaman. Kechagi voqealar haqida ko'p o'yladim. Katta xatoga yo'l qo'yganimni tushundim. Bugun murabbiy, Villi va jamoadoshlarim oldida kechirim so'ramoqchiman. Muxlislardan ham uzr so'rayman. Bundan to'g'ri xulosa chiqaraman va klubning har qanday jazosiga tayyorman" - dedi posbon.