Kamo Gazarov: "Ishontirib aytamanki, tez orada “Dinamo”ning o'yini o'zgaradi"

Avvalgi uchrashuvni o'z uyimizda yirik hisobda boy berganimizning asorati bugungi o'yinda ham sezilib turdi. Garchi o'yindan oldin jamoa o'yinchilari yig'ilib, fikrni bir joyga qo'ygan holda o'ynashni niyat qilishgan bo'lishsa-da, yaratilgan imkoniyatlardan foydalanish jarayonlarida ruhiyatning pastligi xalaqit berdi. Biz Bekobodga ochko ilinjida tashrif buyurgandik. Kamida durang, bo'lmasa g'alaba qozonishni istagandik. Dastlabki daqiqalarda tashabbusni qo'lga olganimizda niyatimiz amalga oshadigandek ko'ringandi. Biroq “Metallurg”ning tajribali o'yin tizginini darhol qo'lga olishdi va bizning niyatlarimizni puchga chiqarishdi. Birinchi gol futbolchilarimiz ruhiyatini tamomila sindirdi, deyishim mumkin.

 Jamoamiz tez orada boshqacha o'yin ko'rsatishini ishonch bilan ayta olaman. Biz kuchlilar safidagi mavqeimizni saqlab qolishimizga ishonaman. Potencial imkoniyatlarimiz yuqori. Jarohatlangan futbolchilarimiz safga qaytishsin, ko'rasiz. Qolaversa, asosiy tarkibning qator o'yinchilari davralar oralig'ida tibbiy ko'rikdan o'ta olishmadi. Ularning ham safga qaytishini kutayapmiz. Xoh safarda bo'lsin, xoh uyimizda, biz qolgan o'yinlarda ham faqat g'alaba ishtiyoqida o'ynaymiz.