Камо Газаров: "Ишонтириб айтаманки, тез орада “Динамо”нинг ўйини ўзгаради"

Аввалги учрашувни ўз уйимизда йирик ҳисобда бой берганимизнинг асорати бугунги ўйинда ҳам сезилиб турди. Гарчи ўйиндан олдин жамоа ўйинчилари йиғилиб, фикрни бир жойга қўйган ҳолда ўйнашни ният қилишган бўлишса-да, яратилган имкониятлардан фойдаланиш жараёнларида руҳиятнинг пастлиги халақит берди. Биз Бекободга очко илинжида ташриф буюргандик. Камида дуранг, бўлмаса ғалаба қозонишни истагандик. Дастлабки дақиқаларда ташаббусни қўлга олганимизда ниятимиз амалга ошадигандек кўринганди. Бироқ “Металлург”нинг тажрибали ўйин тизгинини дарҳол қўлга олишди ва бизнинг ниятларимизни пучга чиқаришди. Биринчи гол футболчиларимиз руҳиятини тамомила синдирди, дейишим мумкин.

 Жамоамиз тез орада бошқача ўйин кўрсатишини ишонч билан айта оламан. Биз кучлилар сафидаги мавқеимизни сақлаб қолишимизга ишонаман. Потенциал имкониятларимиз юқори. Жароҳатланган футболчиларимиз сафга қайтишсин, кўрасиз. Қолаверса, асосий таркибнинг қатор ўйинчилари давралар оралиғида тиббий кўрикдан ўта олишмади. Уларнинг ҳам сафга қайтишини кутаяпмиз. Хоҳ сафарда бўлсин, хоҳ уйимизда, биз қолган ўйинларда ҳам фақат ғалаба иштиёқида ўйнаймиз.