Jasur Jaloliddinov: "Vujudimda "Bunyodkor" qoni oqishda davom etadi"

"Assalomu alaykum hurmatli "Bunyodkor" futbol klubining rahbariyati, ishchi xodimlari, murabbiylari va jonkuyar muxlislari! Bugun sizlarga o'zimni cheksiz minnatdorchiligimni va samimiy tilaklarimni bayon qilmoqchiman. Bolaligimdan futbol sir-asrorlarini o'rgatgan marhum Akmal Risqullaev, klubdagi murabbiylarim Sergey CHigodaev, katta futbolga etaklagan Mirjalol Qosimov, SHuhrat Maqsudov va hozirgi kunga etib kelishimga asosiy sababchi bo'lgan va menga imkoniyat bergan Vadim Karlenovich Abramovga, akademiyada yo'l-yo'riq ko'rsatgan Azamat akaga, yangi jamoaga o'tishimga qarshilik qilmagan va qarorimni hurmat qilgan "Bunyodkor" rahbariyatiga chin dildan rahmat aytmoqchiman. Futbolchilik faoliyatimda yangi sahifa ochish arafasida turibman. Ishonamanki, sizlar mening qarorimni qo'llab-quvvatlaysizlar. Qaerda bo'lsam ham meni katta futbolga va hayotga etaklagan "Bunyodkor" jamoasini unutmayman. Har doim ularni muxlisi bo'lib qolaman. Bu klub mening yuragimda qoladi. Vujudimda "Bunyodkor" qoni oqishda davom etadi. Barchangizga yana bir bor tashakkur",- deydi Jaloliddinov.