Jasur Hakimov: “Paxtakor”da qolishni istayman. Lekin men uchun o'yin amaliyoti muhim”

O'tgan mavsum u jamoasi tarkibida 22ta o'yin o'tkazib, raqiblar darvozasiga 6ta to'p kiritgan. Xuquqiy jihatdan “Paxtakor” futbolchisi sanaladigan Hakimov ayni damda “sherlar” mashg'ulotlarida ishtirok etmoqda. Xo'sh, Jasur bu yil “Paxtakor”da o'ynaydimi? SHu va boshqa savollarga javob olish maqsadida uning o'ziga murojaat qildik.

- “Paxtakor” bilan besh yillik shartnoma tuzgandim. U hamon o'z kuchini yo'qotgani yo'q. SHu bois xuquqiy jihatdan “sherlar”ga tegishliman. O'tgan yillari “So'g'diyona”da ijara asosida o'ynab kelayotgandim. Ayni damda esa “Paxtakor” ihtiyoriga qaytganman. Hozircha jamoa mashg'ulotlarida astoydil ishlayapman.

- Kelgusi taqdirim haqida hozircha tayinli gap ayta olmayman. Yashirmayman ayrim klublar meni o'z safiga chorlamoqda. Bu borada “Paxtakor” rahbariyati bilan maslahatlashgan xolda ish tutaman.  

- O'zimga qolsa bu yil ham garchi ijara bo'lsada, boshqa o'rtamiyona jamoaga borib, ko'proq o'yin amaliyotiga ega bo'lganim maqul. CHunki ayni o'ynaydigan paytim kelganida “Paxtakor” zaxirasida o'tirish, bu – o'sishdan to'xtab qolish demakdir. Vaziyatga real baho beradigan bo'lsak, hozir “sherlar” safida hujumchi Igor Sergeevga bo'lgan ishonch yuqori. U milliy terma jamoa darajasidagi o'yinchi. Murabbiy o'ziga dushman bo'lmasa kerak, uni zaxiraga o'tkazib, meni asosiy tarkibda o'ynatgani. Yana kim biladi deysiz. Hozircha mashg'ulotlarda ishtirok etyapman.

- Albatta, “Paxtakor”dek Osiyoning eng kuchli klublaridan biri bo'lgan jamoada o'ynash sharaf. Menimcha har qanday futbolchi “sherlar” tarkibida o'ynashni istaydi. Osiyo chempionalar ligasida o'ynash imkoniyatini yuzaga keladi. Biroq gap o'ynash o'ynamaslikda.

- Yaqinda Davron aka Fayziev bilan uchrashib, gaplashganimda yana “So'g'diyona”ga qaytishim borasida fikrimni so'radi. Ammo nazarimda jizzaxliklar yana meni ijaraga olib o'ynatishni unchalik istamayotgandek. Oldimda boshqa variantlar ham yo'q emas. Ammo yakuniy qarorni “Paxtakor” rahbariyati chiqaradi – deydi Jasur Hakimov.

Islombek Rustambekov.