Jalolobodda "Barselona" akademiyasi ochildi

Marosimda Kataloniyaning "Barselona" klubi prezidenti Joan Laporta va afsonaviy futbolchilar ishtirok etdi.

Qirg'iziston prezidenti Sadir Japarov bugun Jalolobod shahrida “Barselona” futbol akademiyasini rasman ochib berdi. 

Sadir Japarov futbol millionlab insonlar qalbini to'lqinlantirib, o'ziga xos tuyg'ularni uyg'otadigan hayajonli o'yin ekanligini takidladi. SHu bois futbol dunyodagi birinchi raqamli sport turi hisoblanadi. Butun dunyodagi singari Qirg'iz Respublikasida ham futbolning nufuzi juda yuqori, uning yuz minglab muxlislar bor.

"Futbolchilarimizning so'nggi yillarda erishgan yutuqlaridan mamnunmiz, ajoyib taassurot qoldirgan jamoamizning g'alabalaridan mamnunmiz. Masalan, 2019 yilgi Osiyo kubogi Qirg'iz futboli uchun tarixiy voqea bo'ldi. Jasur yigitlarimiz qirg'iz o'g'lonlarining matonati va irodasini butun dunyoga namoyish etib, ajoyib o'yin ko'rsatdi. SHu bilan birga jamoamiz o'z mahoratini yana bir bor isbotlab, bo'lajak Osiyo chempionatiga yo'llanmani qo'lga kiritdi. Sportdagi g'alaba va muvaffaqiyatlar hamisha yurtdagi hamjihatlik, ahillik va taraqqiyot ko'rsatkichi bo'lib kelgan. SHu bois davlat hamisha sportning ushbu turini qo'llab-quvvatlaydi”, dedi prezident.

Sadir Japarov bugungi kunda Qirg'iz Respublikasida futbol rivoji yangi dinamik yo'nalish olganini ham takidladi. Mahalliy futbol o'z rivojida yana bir katta qadam tashlandi. Jahon futbolining etakchi klublaridan biri “Barselona”ning yorqin, zamonaviy hamda barcha xalqaro talablarga javob beradigan akademiyasi ochildi.

"Barselona" akademiyasining bunyod etilishi nafaqat Qirg'iz Respublikasi, balki butun Markaziy Osiyodagi eng yirik futbol infratuzilma loyihalaridan biri bo'ldi desam, adashmayman. Mamlakatimiz viloyatlarida ham istedodli sportchilar ko'p. Ular maydonga tushib, terma jamoa va mahalliy futbol klublarida shug'ullanishadi. Mamlakatimizning janubiy viloyatlaridan Nodir Payazov, Vladimir Melnichenko, Nematjon Zokirov, Asilbek Momunov, Vladimir Vlasichev va boshqa ko'plab buyuk futbolchilarning nomlari respublikamizda keng tanilgan. Bugun rasman ochilgan akademiya tufayli eng yaxshi futbolchi va murabbiylar safi yanada ko'payadi, deb o'ylayman, - dedi davlat rahbari.

Akademiyaning ochilishi viloyatda istiqomat qilayotgan o'smir va yoshlar o'rtasida sog'lom turmush tarzini targ'ib qilish, sog'lom yosh avlodni voyaga etkazishda alohida hissa qo'shishiga ishonch bildirilmoqda. Sadir Japarov ushbu loyihani amalga oshirish mamlakatni 2026 yilgacha rivojlantirish milliy dasturiga kiritilgan maqsadlari bilan hamohang ekanini takidladi. Prezident o'lkada futbolni rivojlantirish borasidagi ishlar shu bilan tugamasligiga vada berdi.

"Men o'zim futbolchiman, lekin kurash va boksni yaxshi ko'raman, Qamchibek Qidirshaevich (Toshiev, Milliy xavfsizlik davlat qo'mitasi boshlig'i) kurashchi, lekin futbol ishqibozi. Bugun futbol akademiyasining ochilishida uning xizmatlari katta. Yurtimizda xalqaro akademiyalar soni ko'payib, futbol infratuzilmasini rivojlantirish borasidagi ishlarimiz muvaffaqiyatli davom etsa, o'ylaymanki, yosh futbolchilarning mahorati sezilarli darajada oshadi va yangi marralarni zabt etadi! Akademiya tarbiyalanuvchilari kelajakda terma jamoa safiga qo'shilib, xalqaro maydonlarda yurt sharafini munosib himoya qiladilar, degan umiddaman. Jahon chempionatida o'ynash shunchaki orzu emas, bu orzularim yaqin kelajakda amalga oshishiga qatiy ishonaman”, — dedi Sadir Japarov.

Prezident mehmonlarga mamlakatga tashrif buyurib, qirg'iz xalqiga haqiqiy futbol bayramini ulashgani uchun minnatdorchilik bildirdi.