Jaloliddinovga "Galatasaroy" va "Trabzonspor" klublari qiziqish bildirgandi

Antaliyada yig'in o'tkazayotgan "Nasaf" Ruminiyaning “Universitatya Kluj” jamoasi bilan durangga imzo chekdi. 

Uchrashuvni tomosha qilish uchun borgan Championat.asia vakili mahalliy agentlardan biri bilan tanishdi. Ayni paytda futbol agenti sifatida faoliyat yuritayotgan Hayati SHen kuni kecha "Qayrat" jamoasiga transfer qilingan Jasur Jaloliddinov haqida gapirdi.

"Bu futbolchini "Trabzonspor" skauti sifatida ishlab yurgan chog'imda O'zbekiston o'smirlar terma jamoasining Antaliyadagi yig'inida ko'rganman. CHap oyoqda to'p tepadigan, jussasi kichkina, ammo harakatlari juda ajoyib bo'lib, maydon markazida dominantlik qilardi.

Biz u yigitni o'rgandik, harakatlarini kuzatdik. Juda iqtidorli edi, ammo »Trabzonspor«da o'ynab keta oladigan saviyada emasdi. 

O'shanda 10-raqamli yigitni Istanbulning grand jamoalari — "Galatasaroy", "Beshiktosh" va "Fenerbaxche" skautlari ham qiziqish bilan kuzatgandi.

Undagi iqtidor yaqqol namoyon bo'lgandi. Lekin Turkiya superligasida, xususan, grand klublarda o'ynab ketish uchun iqtidorli bo'lishning o'zi etarli emas. Siz tayyor futbolchi bo'lishingiz kerak", - deydi mezbon mamlakat vakili.