Jafar Irismetov “Bunyodkor”ning finalga chiqish imkoniyatini yuqori baholamoqda

Unda poytaxtning ikki klub final yo'llanmasi uchun kurash olib boradi. “Bunyodkor” – “Paxtakor” uchrashuvi oldidan taniqli sobiq hujumchi Jafar Irismetovning fikrlari bilan qiziqdik. 

- Menimcha bugungi uchrashuvda “qaldirg'ochlar”ning imkoniyati yuqori. Sababi ular ilk uchrashuvda g'alaba qozonib, juda qulay imkoniyatni yaratib olgandi. Bugun “Paxtakor” kamida 2:0 hisobida g'alaba qozonishi shart. Ammo “Bunyodkor” bunga yo'l qo'yadimi yo'qmi, o'yin ko'rsatadi – deya gap boshladi Irismetov. 

- Bilasizmi chempionat bilan kubok o'yinidagi farq katta. Aytaylik chempionatda mag'lub bo'lsangiz keyinchalik, yana to'g'rilab ketishingz mumkin. Kubokda esa ikkita yoki bitta o'yinda hal qilish mumkin. SHuningdek gollar nisbati ham yuqori o'rin tutadi. Misol uchun kecha bo'lib o'tgan “Lokomotiv” – “Nasaf” o'yinini oladigan bo'lsak, “temiryo'lchilar” hisobni ochganidan so'ng, yana gol urishga qiynaldi. Bugun bu borada “Paxtakor”ga ham oson bo'lmaydi. “Bunyodkor” tarkibi asosan yoshlardan iborat bo'layotgani uchun ularga ko'pincha barqarorlik etishmayapti. SHunisi aniqki, har ikki klub ham finalga chiqish uchun borini berib o'ynaydi. “SHerlar” ham yaxshi jamoa. Ularda g'oliblik ruhi mujassam. 

- Ikkinchi finalchi nomalum bo'lib turgan bir paytda Kubokni kim yutishini aytish qiyindir. Agarda “Paxtakor” finalga chiqsa, “Nasaf” bilan uchrashuv qiziqarli va keskin o'tishini oldindin tahmin qilish mumkin. “Bunyodkor” chiqsa qarshiliklar g'olib chiqish ham mumkin. CHunki ularda tajriba ko'p. Anchadan buyon bir xil tarkib bilan ishtirok etib kelmoqda. Yana kim biladi deysiz. Bu shunchaki taxmin. Futbolda hamma narsa bo'lishi mumkin. Asosiysi muxlislar finalda qaysi jamoa o'ynasa ham rohatlansin - deydi Jafar Irismetov.

Islombek Rustambekov suhbatlashdi.