Ixtiyor Toshpo'latov: "Katta futbolni sog'indim"

Toshpo'latov bilan uning bu yilgi faoliyati borasida suhbatlashdik.

- Ixtiyor, bu yilgi mavsum siz uchun qanday o'tmoqda?

Qishgi yig'inni Jizzaxning "So'g'diyona" klubida o'tkazdim. So'nggi kunlarda jizzaxliklar ijaraga olishni istamagani uchun yana "Mashal"ga qaytdim. Mavsumning boshida asosiy tarkibga kirishim uchun muammolar bo'ldi. Qishg'i yig'inda birga bo'lmaganim pand berdi. Keyinchalik tarkibda o'ynay boshladim va yomon o'yin ko'rsatmadim degan umiddaman. 12-turda "Lokomotiv" bilan o'yinda jarohat oldim va ikki oy mashg'ulotlarsiz qoldim. Hozirda umumiy guruhga qaytdim. Umuman olganda yarim mavsumdan to'la ko'nglim to'ldi deya olmayman.

- Bu orada siz Olimpiya terma jamoasidan ham taklif olgan edingiz...

Darhaqiqat , menda jarohat bor vaqtida taklif keldi. Bundan juda xursand bo'ldim. Yana 3 yildan so'ng O'zbekiton terma jamoalaridan taklif oldim. Oxirgi marta O'zbekiston o'smirlar termasida harakat qilgan edim. Bu menga juda katta ishonch bag'ishladi. Endi ertaroq safga qaytish uchun jiddiy ishlayapman. Futbolga qaytishni va o'ynashni sog'indim.

- Sizga murabbiy Oliy ligada ko'p ham ishonch bildirgani yo'q? Buning sababi nimada deb o'ylaysiz?

Bu murabbiyni istagi va uning xohishi. Balki men murabbiy kutgan darajada o'yin ko'rsatmagandirman. Aybni o'zimdan qidirsam to'g'ri bo'ladi. Har bir o'yin og'ir kechmoqda shu bois murabbiy eng kuchlilarga ishonmoqda.

- Jamoaning bu yildagi salbiy natijalariga nimalar sabab bo'lmoqda?

Jamoaviy o'yin va ahillik yo'q. SHu bois ko'p o'yinlarda bu pand bermoqda. Ikkinchi davrani ham kutilganidek boshlay olmadik. Keyingi uchrashuvlarda bu vaziyatdan chiqib ketish uchun harakat qilamiz.