Intervyu: Aleksandr Geynrix JCHga chiqish istagi, faoliyatidagi qiyinchiliklar va Suriya bilan o'yindagi selfi haqida

O'FF matbuot xizmati tomonidan tashkil qilingan suhbat chog'ida tajribali futbolchi faoliyatidagi qiyinchiliklar, saralash bosqichidagi bo'lajak to'qnashuvlar, JCH–2018 turniriga chiqish orzusi hamda Suriyaga qarshi o'yindagi selfi haqida so'zlab berdi.

FIFA muxbiri Aleksandr Geynrixning Suriya bilan o'yinda olgan selfisiga oldindan tayyorgarlik ko'rgan-ko'rmagani haqidagi savolga quyidagicha javob berdi: “Suriya bilan o'yindagi selfi o'z-o'zidan kelib chiqdi. Jurnalist Nodirxo'ja Yo'ldoshev telefonini menga uzatdi va ajoyib ehtiroslar ostida selfiga tushdik”.

O'zbekistonlik hujumchidan intervyu olgan muxbir Geynrixni bir necha kun oldin faoliyatini yakunlagan Franchesko Tottining selfi bilan gol nishonlashiga qiyosladi.   

“Totti menga yoqadi, u haqiqiy afsona. Uning so'nggi o'yinini ko'rdim va futbol bilan xayrlashganini ko'rib yig'ladim. U singari gol nishonlaganimdan mamnunman”, – deya javob berdi hujumchi.

O'zbekistonlik hujumchi Rossiyada bo'lib o'tadigan Jahon chempionatiga chiqish istagi haqida qo'yidagi fikrlarni bildirdi: “Rossiyadagi JCHga borishni juda ham xohlar edim. JCH qanday ekani haqida tushunchaga egaman, chunki 2003 yili BAAdagi U-20 Jahon chempionatida ishtirok etganman. Rossiyadagi JCH–2018 turnirida qatnashib, keyin faoliyatimni tugatishni istardim”.  

Aleksandr Geynrix O'zbekistondan tashqari faoliyati davomida Rossiya, BAA, Janubiy Koreya chempionatlarida to'p surgan. Ayni vaqtda esa u Qozog'istonda o'ynamoqda. Futbolchi turli mamlakatlarda har xil futbol madaniyatiga duch kelgani va o'ziga yarasha tajriba orttirganini malum qildi.

“Rossiyaga birinchi borganimda juda yosh edim va u erda futbol o'ynash oson emasligini tushundim. Mashhur liga, nomdor futbolchilar, katta pul. Asosiy tarkib azosi bo'lish oson bo'lmaganini tan olish kerak. BAAda umuman boshqacha bo'lgan: o'zgacha texnika va noodatiy madaniyat. Rossiya va BAAdagi faoliyatim davomida o'zim uchun kerakli xulosalar chiqarib, tajriba to'plaganman.

Janubiy Koreyada esa qiynalganman. Bu erdagi hayot tarzi, mahalliy ovqat, shuningdek, mashg'ulotlarga ko'nikish oson kechmagan. Bir oy o'tgach K-Ligada menga mushkul bo'lishini tushundim. Menimcha, Koreyadagi kareram eng qiyini bo'lgan. Qozog'istonda ham anchadan buyon o'ynayman va bu er menga maqul. Qozog'iston va O'zbekiston bir-biriga yaqin bo'lgani uchun deyarli barcha narsalar bir xil va aynan shu narsa menga qulaylik yaratmoqda”, – dedi o'zbekistonlik xujumchi.

Malumot o'rnida: Aleksandr Geynrix faoliyati mobaynida “Do'stlik” (2001), “Paxtakor” (2002, 2005, 2007–2011), CSKA (2003–2004, Rossiya), “Torpedo” (2005–2006, Rossiya), “Suvon Blyuvings” (2011, J.Koreya), “Emireyts” (2012, BAA), “Aktobe” (2012–2014, Qozog'iston), “Lokomotiv” Toshkent (2014) klublarida to'p surgan. 2015 yildan buyon esa u Qozog'istonning “Ordabasi” jamoasi sharafini himoya qilmoqda.

Aleksandr Geynrix 2002 yildan buyon milliy terma jamoa sharafini himoya qilib kelmoqda. SHu vaqt mobaynida u 93 uchrashuv o'tkazib, 31 ta golga mualliflik qildi. Terma jamoa safidagi o'yinlari soni 100 taga etib qolganiga qaramay, Geynrix individual natijalar muhim emasligini, asosiysi jamoaviy o'yin ekanini takidladi.

“Men shaxsiy natija yoki rekordlar ortidan quvmayman. Futbol – jamoaviy o'yin va bu eng asosiysi”, – dedi Geynrix.

JCH–2018 turniriga saralash bosqichi haqida fikr bildirar ekan, Aleksandr Geynrix so'nggi turda Janubiy Koreyaga qarshi kechadigan o'yin hal qiluvchi ahamiyatga ega yoki ega emasligi haqida gapirish ertaligini aytdi.

“Bu haqda gapirishga hali erta. Janubiy Koreyaga qarshi o'yin hal qiluvchi bo'lishi uchun oldindagi o'yinlarda ochko olishimiz kerak. Keyin koreyaliklarga qarshi o'yinni hal qiluvchi desak bo'ladi. “JCH–2018 musobaqasiga avtomatik ravishda yo'l olish uchun bor kuchimizni beramiz. Barchasi o'z qo'limizda”, – dedi hujumchi.

Malumot o'rnida: JCH–2018 turniriga saralash bosqichi “A” guruhi 7-turidan keyin vaziyat quyidagicha: Eron 17 ochko bilan peshqadam. Janubiy Koreya 13 ochko, O'zbekiston 12 ochko bilan mos ravishda 2–3 o'rinlarni egallab turibdi. Guruhdagi 4–6 o'rinlarni esa tegishli ravishda Suriya (8 ochko), Xitoy (5 ochko) va Qatar (4 ochko) egallagan.

Aleksandr Geynrix O'zbekiston safida gol ursa qanday nishonlashi haqidagi savolga quyidagicha fikr bildirdi. “Navbatdagi golimni qanday kiritishimni TV orqali ko'rasiz. Bu siz uchun ‘syurpriz’ bo'ladi”, – deya intervyuga yakun yasadi Aleksandr Geynrix.

Malumot o'rnida: O'zbekiston milliy terma jamoasi 12 iyun kuni Tehronda Eron mehmoni bo'ladi. 31 avgust kuni esa Samvel Babayan shogirdlari safarda Xitoy bilan, 5 sentyabr kuni esa Toshkentda Janubiy Koreya bilan to'qnash keladi.