Inqilob (O.A. blogi)

Bu fikrlarim bilan “Yuventus” yoki “Real”ning kushandasi emasman, ushbu klublarni baholashni so'rasangiz, panjalarimni baralla ochib baho beraman; agar “Barselona” chempion bo'lganda ham bayram qilmasdim. Aytmoqchi bo'lganim, bu klublar katta inqilobni amalga oshirishdi, chempionat atmosferasiga yangi shabboda olib kirishdi. Meni mana shu narsa quvontirdi. 

Etibor bergan bo'lsangiz, ushbu mavsum inqiloblarga boy bo'lmoqda. Portugaliyada “Sporting” 19 yil deganda shohsupaga kutarildi, ungacha “Portu” va “Benfika” chempionat kubogini “Bor tovog'im, kel tovog'im” qilishayotgandi. “Inter” esa Turin qalasini bunyod etishda o'z hissasini qo'shgan Konte boshchiligida o'zi qurgan devorni ag'anatdi. “Matraschilar” so'nggi o'n yillikda dovrug' qozondi, garchand 2013/14 yilgi mavsum chempionlik kubogini boshlari uzra yuqori kutarishgan bo'lsa-da, bugungi titulgacha o'sha vaqtda endi tug'ilgan go'dak maktab yoshiga etib ulgurdi. Navbatdagi umidim “Lill” klubidan bo'lib turibdi. Umid qilamanki, Kristof Galte shogirdlari futbolda har doim ham “limon”lar rol o'ynamasligini isbotlaydi. 

Bu kabi inqiloblardan boshqa chempionatlarda ham bir nechtasini sanab o'tish mumkindir, afsuski, barchasini qidirgani internet titkilashga erindim. Ko'zga ko'ringan chempionatlardan faqatgina “Bavariya” qo'rg'oni chang o'tmas darajada zirhlangan. Menimcha, ularning o'zlariyam necha marta g'oliblikni kiritganini sanab berolmasa kerak. SHu o'rinda milliy chempionatimizchi, degan savol ham ko'z oldimizdan o'tishi, shubhasiz. Qaysi klubning belbog'i baquvvat bo'lsa, turnaqator mavsumlarda o'sha jamoaning chempion bo'lishini oldindan bashorat qiladigan bo'lganmiz. Ushbu mavsumda ham bazilar mavsum boshidayoq chempionlarini aniqlab qo'yishgan bo'lsa, ajablanmayman. Mavsum yakunigacha hali qovun pishig'i bor, shu bois bu borada folbinlik qila olmayman. Lekin istardimki, “Nasaf”, “AGMK” kabi klublar ham chempionlik zavqini totib ko'rishsa. Yuqorida takidlaganimdek, bu bilan biror jamoaga muxlis yoki qarshi emasman, shunchaki bu kabi inqiloblar ko'pincha rivojlanish uchun xizmat qiladi. Inqilob egalarining ruhiyati tog'dek ko'tariladi, shuningdek, ular kubokni keyingi mavsum ham begona qilmaslikka harakat qilishadi, yiqilgan gegemon esa yana o'zi qumsaydigan taxt sari talpinadi. Qolgan klublar ham mo'jiza sodir bo'lishiga ishonishadi. Natijada, raqobatdoshlik hamda tomoshaboplik darajasi yuqorilaydi. Garchand tarixdagi siyosiy inqiloblarning barchasi ham rivojlanishga xizmat qilmagan bo'lsa-da, futbolda uning aksi deb o'ylayman, albatta, natija jihatdan. SHu kunlarda kutayotgan eng katta inqiloblarimdan biri esa tojdor virus balosidan butkul qutilib, dunyoning barcha stadion eshiklari muxlislar uchun ochilishini kuzatish bo'lib turibdi.

Oqil Abdubarnoev