Ilk uchrashuvga 26 kun qoldi. Mirjalol Qosimov birinchi yig'in haqida

17 dekabr kuni terma jamoamiz hal qiluvchi yig'inni o'tkazish uchun yana bir bor Dubayga yo'l oladi. Bu safar tarkibdan 27 nafar futbolchi joy oladi. Omadli 23 nafar o'yinchi esa hal qiluvchi musobaqaga yo'l oladi.

Birinchi yig'in qanday o'tdi, undan murabbiyning ko'ngli to'ldimi, shular haqida bilish maqsadida Mirjalol Qosimov bilan bog'landik.

"Birinchi yig'in reja asosida bo'lib o'tdi. Faqat hisobdagi ikkinchi o'yin o'tkazilmagani biroz o'zgartirishlarga sabab bo'ldi. Bu o'yinning muhim tomonlari ko'p edi. Afsuski, Fors ko'rfazi Kubogidan so'ng Quvayt terma jamoasining bosh murabbiyi o'zgardi. Natijada raqiblarimiz o'z rejasiga o'zgartirish kiritdi. BAAda liga o'yinlari davom etayotgani bois, jamoa topish qiyin bo'ldi. Bu paytda birinchi liga vakili "Al SHaab" bo'sh edi. Ammo ular bilan ham o'yin tashkil etilmay qoldi", - deydi Mirjalol Qosimov.

Yig'inda ishtirok etgan futbolchilardan to'rt nafarining Osiyo Kubogiga bora olmasligi malum bo'ldi. Bu haqda murabbiy shunday deydi:

-  Birinchi mashg'ulotda hammani tekshirib olishimiz muhim edi. Murzoev, Salomov, Merzlyakov va Ibragimov doim nazoratimizda bo'lib kelishgan. Ularni keyinchalik ham terma jamoaga yordami tegishi mumkinligini inobatga olgan holda shunday vaziyatlarda MTJ muhitini sezdirib turishimiz kerak. Ikkinchi yig'inga Ahmedov, Haydarov, Tursunov, Denisov va Nasimov qo'shiladilar.

Dastlabki yig'indagi raqiblar kuchsizroq edi. Futbolchilar ortiqcha zo'riqishsiz o'ynadilar. Ammo jismoniy tayyorgarlikka alohida etibor berildi.

- Osiyo Kubogidan oldin jismoniy holatimizni yaxshilab olishimiz shart. Boisi u erda oddiy o'yin bo'lmaydi. Ikki o'yinda futbolchilarimiz ancha engil harakat qilishdi. Osiyo Kubogida esa bunday bo'lmaydi.

Mirjalol Qosimovning birinchi yig'indan ko'ngli to'ldimi, futbolchilardan-chi?

- Mazkur ikki yig'indan ko'nglim to'lgan, to'lmaganini Osiyo Kubogidagi natijamizdan so'ng aytishim mumkin. Futbolchilarning barchasi musobaqaga borishni istayapti, chunki bu katta forum. Unda har kim ham o'ynashni istaydi, shuning uchun alohida bir futbolchini ajratib ko'rsatmagan bo'lardim. Barcha masuliyatni birdek xis qilib turibdi.

N.Yuldashev