Ilhom Mo'minjonov: “Javohir Sidiqovning o'zi penalti bo'lmaganligi aytib uzr so'radi”

- O'yin shiddatli bo'ldi, bunga o'zinglar ham guvoh bo'ldinglar. Principial ahamiyatga ega “vodiy derbi”siga jiddiy tarzda tayyorgarlik ko'rgan edik. G'alabani qo'ldan chiqardik. So'nggi ikki-uch daqiqada himoyadagi xatolar pand berdi. Yosh himoyachimiz Abbos Otaxonovga o'yin oxirida tajriba etishmadi. Mana shunday o'yinlar orqali futbolchimiz toblanib boradi. Oxirida o'tkazib yuborilgan gol alamli bo'ldi. Kovalenkoni oliy darajadagi hakam deb bilaman. Uni qanday saviyadagi hakam ekanligini muxlislarimiz ham yaxshi bilishadi. Hakamlarni xatti-harakatini muhokama qilishni istamayman. Hakamlarni o'yinini nazorat qiladigan masul shaxslar bor. SHunday ekan, Kovalenkoni o'yiniga nazoratchilar baho berishsa to'g'riroq bo'lardi. SHu sababli, bu mavzuda boshqa fikr bildirmoqchi emasman. Etiborli jihati, Javohir Sidiqovni o'zi maydondan chiqib ketayotib, penalti bo'lmaganligi aytib, futbolchilarimizdan uzr so'radi. Hattoki ko'zidan yosh oqqanligini ham etirof etishdi.

Bu yilgi mavsumda chempionatimiz saviyasi ancha oshdi. Bu haqda oldingi matbuot anjumanlarida ham gapirib o'tganman. SHu sababli har bir jamoa maydonga birinchi bor tushayotgandek taassurot uyg'onmoqda. Hozirgi kunda “Navbahor” shiddatli o'yinlarni olib kirishga harakat qilmoqdaman. Qanday raqib bo'lishidan qatiy nazar futbolchilarimiz bor kuchlari bilan to'p surishmoqda. SHiddatli o'yinlarni nafaqat “Navbahor” balki boshqa klublar ham namoyish etishmoqda. Bu ketishda futbolimiz yanada rivojlanadi deb o'ylayman. CHempionatimiz shu tarzda davom etadigan bo'lsa yaqin yillar ichida albatta jahon chempionati yo'llanmasiga ham ega bo'lamiz. Hozirda jamoamizda to'p surayotgan futbolchilar iroda ko'rsatib, jamoaning ijobiy natija qayd etishi uchun intilishmoqda. Buning uchun ularga rahmat aytaman.

Navbatdagi “Buxoro”ga qarshi uchrashuv oldidan ayrim yo'qotishlarimiz bor. Yovanovich bu safar maydonga tusha olmaydi. U bugun ham jarohat sababli maydonga tushmasligi kerak edi. SHunga qaramay uni maydonga tushirgandik. Birinchi bo'limdan keyin Yovanovich almashtirishimizni so'ragandi. Ammo, o'yin ahamiyatidan kelib chiqib, uning xizmatlaridan ko'proq foydalanishga qaror qildik. Bu esa jarohatini yanada jiddiylashishiga olib keldi va uni tiklanishi biroz cho'zilsa kerak. Azam Aliev esa sariq kartochkalari soni to'rttaga etganligi sababli Buxoroda jamoaga yordam bera olmaydi. Ro'zimboy Ahmedovda ham jarohat mavjud. Ikki oldin Ro'zimboy gipsdan xalos bo'ldi. Uni tiklanib, tayyor bo'lishini kutamiz. Yo'qotishlar bo'lishiga qaramay ularni o'rnini bosa oladigan futbolchilarimiz bor. SHunday ekan ularga ham imkon beramiz.

Buxoroda o'tadigan uchrashuvga tayyorgarlikni bugundan boshlaymiz. Bir necha kun Namanganda shug'ullanib, keyin Toshkentga yo'l olib, shundan so'ng Buxoro sari yuzlanamiz. Xudo xohlasa Buxorodan ijobiy natija bilan qaytishga harakat qilamiz. Sababi ortga yo'l yo'q. Qanday raqib bo'lishidan qatiy nazar faqat oldinga intilib, murosasiz tarzda qarshilik ko'rsatamiz. CHempionatning 10-turiga qadar jamoamiz ishtirokidagi uchrashuvlarga bugungidek ko'p muxlis yig'ilmagandi. Agarda jamoamix maydonda munosib tarzda to'p surmaganida, bu qadar ko'p ishqiboz yig'ilmasdi. Yigitlarga bu mehnatlaring samarasi ekanligini aytib o'tdim. Bugungi natijani muxlislarimiz  qanday qabul qilishadi bilmayman. Ularni yana o'yingohni to'ldirishlari uchun ijobiy natijalarni qo'lga kiritishimiz lozim. Agarda muxlilarimiz jamoani hurmat qilib “Bunyodkor” bilan o'tadigan bahsda ham o'yingohni to'ldirishsa bundan xursand bo'lamiz va chiroyli o'yinlar va ijobiy natija orqali ishonchni oqlashga harakat qilamiz.

Komilovni jarohatini jiddiy deb aytishdi. Oyog'ining tizza qismi qayrilgani uchun maydonga qaytishi uchun qancha vaqt ketishi nomalum. Qilichevni o'zi almashtirishimizni so'radi. SHunga qaramay, uni ham maydonda malum vaqt ushlab turdik. Katta xajmdagi ishni amalga oshirdi va biroz toliqib qoldi. Hujum chizig'ini kuchaytirish maqsadida Xursanov va Sultonovlarga imkon berdik.