Ilhom Mo'minjonov: "Futbolchilarimga o'yin uchun 10 ball qo'yaman"

O'yin haqida

- Bugungi raqibimiz musobaqa jadvalida birinchi o'rinni egallab turgan jamoa edi. "Dinamo" murabbiyi tajribali mutaxassis hisoblanadi. Bugun ular maydonga ikki nafar hujumchi bilan tushishdi. Futbolchilarimizga rahmat aytaman, ular biz murabbiylar tomonidan berilgan ko'rsatmalarni alo darajada bajarishdi. Yuzaga kelgan xavfli vaziyatlardan unumli foydalandik va yirik hisobdagi g'alabaga erishdik.

- Birinchi bo'limning dastlabki daqiqalarida raqibga ustunlik boy berilgandek ko'rindi. Keyinroq esa jamoa o'z o'yinini topib oldi. Buni qanday izohlaysiz?

- Aytib o'tganimdek, raqib bugun doimgidan boshqacha uslubda, yani ikki hujumchi bilan o'ynadi. Ular uzun uzatmalar evaziga dastlabki daqiqalarda bir oz ustunlikka ega bo'lishdi. Lekin yigitlar 15 daqiqa chidab berishdi va keyinchalik jarima zarbasidan gol urganimizdan so'ng o'yinni o'z nazoratimizga oldik. SHundan so'ng mehmon futbolchilari charchab qolishdi. Futbolchilarimizning jismoniy tayyorgarligi hozirgi kunda yaxshi xolatda. Yigitlar yugurishdi va mehnat qilishdi. Bugungi futbolda yugurmasa bo'lmaydi. SHogirdlarimga bugungi o'yin uchun 10 ball qo'yaman, chunki ular bugun murabbiylar tomonidan berilgan barcha ko'rsatmalarni alo darajada bajarishdi.

- O'yin davomida jamoangiz gol urgan vaziyatlarda tribuna tomonga qarab-qarab qo'ydingiz. Bu kabi g'alabalar muxlislar ishtiroki bilan yanada zavqli chiqqan bo'lar edimi?

- Albatta yaxshi bo'lardi. Men har bir o'yinga futbolchilar bilan birgalikda tayyorgarlik ko'raman. O'yin davomida emociyalarimni shu orqali chiqarib olaman. Muxlislar bor bo'lsa bu yaxshi. Lekin hozir pandemiya sharoiti, kasalliklar tarqalishi kamaysa stadionlarga muxlislar qaytarilsa kerak. Muxlislarga sabr tilayman, ular bizni duo qilib turishsa biz ko'zlangan maqsadga erishamiz. Hozir Pro-liga o'yinlari TV orqali namoyish etilmoqda. Hozir chemmpionatda kuchsiz jamoaning o'zi yo'q. Mana "SHo'rtan" klubi ham yaxshi o'yin namoyish etmoqda.

- Jamoaning O'zbekiston kubogidagi ishtirokiga nima deya olasiz? "Neftchi" Superliga klubi bilan tengma-teng o'ynay oladimi?

- O'zbekiston kubogi musobaqalarida keyingi bosqichga chiqdik. Raqibimiz Olmaliqning AGMK klubi bo'ladi. Bu o'yin orqali yigitlar o'zlarini sinab ko'rishadi, biz Superliga klubi bilan bahs orqali jamoani ko'rib olamiz. "Neftchi" har bir o'yinda g'alaba uchun maydonga chiqadi.