Ikrom Aliboev: "Loko"ning vazifasi - chempionlik. Mening asosiy maqsadim - "kuchli beshlik"ka yo'l olish"

"Jamoamiz bilan ikkinchi davraga tayyorgarlikni Avstriyada olib bordik. Hammasi reja asosida o'tdi. U erda to'rtta nazorat uchrashuvi o'tkazdik. Barcha o'yinlarda qatnashdim. Jarohatimdan forig' bo'ldim. Ikkinchi davra o'yinlarida maydonga qaytaman", - deya gap boshladi Ikrom Aliboev.

- "Lokomotiv" ikkinchi davrada peshqadamlikni o'z qo'liga olishiga ishonasizmi?

- Buni hammasini vaqt ko'rsatadi. Bizning maqsadimiz doimo birinchi o'rinni qo'lga kiritish. Bu mavsumda chempionlikni qo'lga kiritishni istaymiz. Ikkinchi davradagi barcha bellashuvlarni o'z foydamizga hal etishga harakat qilamiz.

- O'zbekiston Kubogining yarim final bahsidagi raqiblaringiz "Nasaf" bo'ladi. "Lokomotiv" ushbu to'siqdan o'ta oladimi?

- Finalga yo'l olishimizga ishonamiz. "Nasaf" juda ham kuchli jamoa. Qarshiliklarda jamoaviy o'yin juda yaxshi yo'lga qo'yilgan. Deyarli barcha futbolchilari 5-6 yildan buyon birga yonma-yon to'p tepishmoqda. Biz esa o'tgan yilgi natijamizni takrorashga urinib ko'ramiz.

- Sizga boshqa jamoalardan takliflar bo'ldimi?

- Hech bir jamoa shaxsan menga taklif bilan chiqqani yo'q. Balki jamoaga bu borada takliflar bo'lgandir. Bu borada xabardor emasman. Bu masalada hammasini klub hal qiladi. O'zbek futbolchilarining birinchi maqsadi evropada to'p tepish. O'zimga keladigan bo'lsak, mening asosiy maqsadim evropaning o'rtamiyona chempionatida emas, balki kuchli beshlik jamoalarining biriga o'tish.


SHahboz Beg'amov suhbatlashdi.