Igor SHkvirin: "Zuagidan boshqa hech kim ajralib turmadi"

Suhbat davomida Igor Anatolevich bu yil shogirdlari orasida SHaker Zuagidan boshqa hech kim ajralib turmaganini aytib o'tdi.

Oliy ligada jamoalar soni oshgani haqida
- Agar moliyaviy talablarni ko'taradigan klublar ko'p bo'lsa, men oliy ligada 18ta jamoa qatnashishi tarafdoriman. Biroq 16ta klub ham yomon emas.

"Olmaliq" 6-o'rinni olgani haqida
- O'tgan yil bilan solishtirganda bu mavsum bir qadam orqaga tashladik. Bundan kerakli xulosani chiqaramiz va kamchiliklarni bartaraf etish ustida ishlaymiz. Kelasi yil medallar uchun kurashadigan jamoa shakllantiramiz.

Zafar Polvonov haqida
- Zafar Polvonov o'tgan yil 14ta gol urib jamoamiz to'purari bo'lgandi. SHundan so'ng yulduzlik kasaliga chalindi, bor gap shu. Menimcha, uni darhol osmondan erga tushirish kerak.

Jamoasidagi legionerlar haqida
- Bu o'rinda avvalo SHaker Zuagini alohida ajratib ko'rsatgan bo'lardim. U o'ziga bildirilgan ishonchni oqladi. Aleksandr Alimpievich ham yaxshi o'ynab turgandi, biroq birinchi davradan keyin ketib qoldi. SHuningdek, safimizni Maqsatmurod SHomurodov ham tark etdi. Zuagi kelasi mavsumni "Olmaliq"da o'tkazmasligi aniq. Bilishimcha, u "Bunyodkor" bilan og'zaki kelishuvga erishibdi.

Diyor Turopov haqida
- Diyor Turopov - alohida mavzu. Futbolchi yarim mavsumni tiklanish bilan o'tkazdi. Qolaversa, ko'pincha terma jamoalarda yurdi. Endi safimizga qaytganida yana terma jamoaga ketib qolaverdi. Qolaversa, jiddiy klublardan taklif bo'layotgani to'g'risidagi gaplar uning boshini aylantirib qo'ydi, garchi hech kim qiziqmagan bo'lsa-da. SHu ham unga xalaqit berdi.