Igor Sergeev: "Asosiy tarkibga loyiq ekanligimni isbotlashim kerak edi"

Uchrashuv tugagach mikst zonada hujumchining fikrlari bilan qiziqdik.

- Birinchi bulimda boshqa, ikkinchi bo'limda umuman boshqa futbol guvohiga aylandik...
- Biz dastlabki bo'limda raqibni o'rgandik desak ham bo'ladi. To'g'ri bu jamoani o'rgangandik lekin maydonda butunlay boshqacha bo'ladi. Bundan tashqari kuchli yomg'ir yog'ib turdi. Ikkinchi bo'limda esa biz jismonan kuchli ekanligimiz ko'rinib turdi. G'alaba uchun intildik va yomg'ir ham bizga xalal bera olmadi.

- Gol urilgan vaqtda yomg'ir sizga yordam berdimi?
- Yo'q, yo'q. Aksincha bunday yomg'irda to'p sirpanib ketadi. SHu bois bor etiborimni to'pga qaratdim va boshim bilan imkoni boricha aniq zarba berishga urindim.

- Bu endi yoshlar o'rtasidagi musobaqa emas, Osiyo Kubogi. Ilk uchrashuvda maydonga tushishingizni kutganmidingiz?
- To'g'risini aytsam kutmagandim. Sababi bizda raqobat juda kuchli. Lekin mashg'ulotlarda astoydil ishladim. Murabbiy menga ishonib asosiy tarkibga kiritdi, unga loyiq ekanligimni ko'rsatishim kerak edi.

Nodirxo'ja Yuldashev
Sidney shahridan