Husan Temirov: “Bunyodkor”ning shashti baland emasdek ko'rindi”

O'yindagi yagona golni penaltidan Artur Gevorkyan kiritdi. Ushbu uchrashuv haqidagi fikrlarini bilish maqsadida taniqli sharhlovchi, ayni paytda Qarshi markaziy stadionida suxandonlik qilayotgan Husan Temirovga murojaat qildik.

- Husan aka, o'yin haqida nima deya olasiz?
-  Qarshi markaziy stadionida bo'lib o'tgan “Nasaf” – “Bunyodkor” qarama-qarshiligini ko'pchilik qatori men ham katta qiziqish bilan kuzatdim. Albatta, “Nasaf”ning 1:0 hisobida g'alaba qozonganidan xursandman. Bu g'alaba barcha qashqadaryoliklarni xursand qilib yubordi.

- Sizningcha, “Nasaf” nimaning evaziga “Bunyodkor”ni mag'lubiyatga uchratdi?

- Avvalo muxlislarning ajoyib tarzda qo'llashi evaziga deb o'ylayman. SHu kuni stadion deyarli to'ldi va bu futbolchilarning ruhiyatini ko'tarib yubordi. Natijada “nasafchilar” tezda tashabbusni o'z qo'llariga olishdi. “Bunyodkor”ning esa shashti baland emasdek ko'rindi. Ulardan Xayrulla Karimov chetlatildi, Pishurning o'yini qovushmadi. Yo'qsa, “Bunyodkor” - kuchli jamoa.

- “Nasaf” bosh murabbiyi Ro'ziqul Berdiev haqida fikringiz qanday?

- Berdiev klub bosh murabbiyi sifatida bu yil to'liq mavsumni o'tkazdi. Menimcha, u yaxshi ishladi. Kuchli jamoani shakllantira oldi deb ayta olaman.

- Ro'ziqul Sadullaevich “Yilning eng yaxshi murabbiyi” deb topilishi mumkin...

- Menimcha, ham shunday bo'ladi. Agar Dilshod Nuraliev jahon chempionatida Gondurasdan o'tganida uning ham nomzodi qo'yilardi. Lekin hozir Ro'ziqul Berdievda imkoniyat ko'proq.

- Bu yil “Nasaf” chempion bo'lishi mumkinmi?

- Buning uchun “Bunyodkor” Jizzaxda, “Lokomotiv” Buxoroda qoqilishi, “Nasaf” esa Olmaliqda g'alaba qozonishi kerak. Jamoa Olmaliqqa faqat g'alabani ko'zlab borishini malum qildi. Lekin nima bo'lishini vaqt ko'rsatadi. Agar “Nasaf” chempion bo'lsa, bu Qashqadaryo ahli uchun katta bayram bo'ladi.

Xayrulla Xoliqov suhbatlashdi.