Hozirgi futbolimizda taktika tomonlama eng kuchli mahalliy murabbiy kim?

Albatta, hozirgi futbolni taktikasiz tasavvur qilish qiyin. Futbolchi individual jihatdan harqancha mahoratli bo'lmasin, murabbiy belgilab bergan taktikaga mos ravishda o'yin namoyish etmas ekan, nimadir o'xshamay qolaveradi. 

O'zbek futbolida ham bir nechta taktik usullar bor. Lekin to'g'risini aytsish kerak, bizda hali taktik o'ynaladigan futbol kuchli rivojlanmagan. Bu o'rinda murabbiylardan ko'p narsa talab qilinadi, zero taktikani jamoa o'yiniga ular olib kiradi. Telegram kanalimizga "Hozirgi futbolimizda taktika tomonlama eng kuchli mahalliy murabbiy kim?" degan savol bilan so'rov qo'ygandik.

Bugun so'rovnoma natijalarini keltirib o'tamiz. Variantlar sifatida bir nechta murabbiy nomini keltirib o'tdik va eng ko'p ovozni (52 foiz) "Nasaf" bosh murabbiyi Ro'ziqul Berdiev to'pladi. So'rovnomada 22 mingdan ziyod o'quvchi qatnashgan bo'lsa, yarmidan ko'pi aynan Berdievni hozirgi o'zbek futbolida eng kuchli taktik murabbiy sifatida belgilagan. 

Bu borada keyingi o'rin 13 foiz ovoz bilan O'zbekiston milliy terma jamoasi bosh murabbiyi Vadim Abramovga nasib etdi. AGMK ustozi Mirjalol Qosimov esa 12 foiz to'plab uchinchi bo'ldi.

"So'g'diyona" bosh murabbiyi Ulug'bek Baqoev 9 foiz to'plagan bo'lsa, Olimpiya terma jamoamiz bosh murabbiyi Timur Kapadze 5 foiz ovozga ega bo'ldi. "Navbahor" ustozi Viktor Jalilov esa 2 foiz ovoz yig'di. SHuningdek, so'rovnomada qatnashganlarning 1 foizi Jasur Abduraimov, Baxtiyor Ashurmatov va Hamidjon Aktamov kabi murabbiylarga ovoz bergan. Ishtirokchilarning 4 foizi esa "Boshqa murabbiy" variantini tanlashgan.

Albatta, bu ko'p fikr-mulohaza talab qiladigan savol hisob hisoblanadi. Lekin bir narsani unutmaylik, modomiki ko'pchilik Ro'ziqul Berdievni birinchi o'ringa qo'ygan ekan, demak "Nasaf" qo'llaydigan taktika ko'pchilikka maqul kelmoqda.