Hamidjon Aktamov: “Baribir mahorat o'z so'zini aytdi”

-  “Nasaf” tajriba va mahorat bobida chempionatimiz etakchilaridan sanaladi, - dedi Hamidjon G'ulomovich. - Bugun jamoamiz ularga qarshi yomon o'yin namoyish etishmadi. Tan olish kerak, “Nasaf” tarkibi oxirgi to'rt-besh yilda deyarli o'zgarishlarsiz maydonga tushib kelmoqda. Bugun yigitlarimizda g'alaba uchun ishtiyoq nechog'li yuqori bo'lmasin, yakunda baribir tajriba o'z so'zini aytdi. SHunga qaramay, jamoamizni uyushqoqlik bilan qo'llab-quvvatlab turgan ko'psonli muxlislarimizga rahmat aytaman.

-  Afsuski, oxirgi uchrashuvlarda ayrim o'yinchilarimizdagi jarohatlar tarkibda muammo keltirib chiqarmoqda. SHu bois, chempionat to'purari Bahriddin Vahobovni zaxirada qoldirishga majbur bo'ldik. Biroq uning ikkinchi bo'limda maydonga tushirilishi jamoamiz o'yinini kuchaytirdi. Jarohatdan so'ng, yarim himoyachimiz Farruh Haydarovning ham bugun o'yinga kirishib ketishi qiyin bo'ldi.

-  Garchi, bugun natijadan qoniqmagan bo'lsam-da, jamoamiz o'yinidan ko'nglim to'ldi. Yigitlarga rahmat aytaman. Kelgusi turlarda ochko yo'qotishga haqqimiz yo'q. Keyingi turda Andijonga safar qilamiz. Unda albatta muxlislarimizni xursand qilish uchun bor kuch-imkoniyatimizni ishga solamiz.