Grigoriy Kolosovskiy: “G'alaba golimiz ham chiroyli, ham muhim bo'ldi”

O'yin haqida

- Albatta “Paxtakor”ga qarshi o'yinlar oson o'tmaydi. Birinchi bo'lim gol o'tkazib yubordik va bu bizga qator qiyinchiliklarni olib keldi. Ikkinchi bo'limda faollikni oshirdik. Bilasizmi, Samvel Babayan davolanish kurslaridan so'ng bizga tegishlicha maslahatlarini berdi. O'yinni nazorat qilishga intildik. G'alaba golimiz ham chiroyli, ham muhim bo'ldi. Qiyin o'yin, raqibdan kelib chiqsak, bu avvaldan malum edi. G'alaba bizga navbatdagi o'yinlar oldidan qo'shimcha ishtiyoq taqdim etsa, ajab emas.

- Bugungi o'yinga tanlangan uslub keyingi uchrashuvlarda ham qo'llaniladimi?

- Ish bergan uslublarni albatta amaliyotga joriy qilamiz. O'yin tashkil etish borasida Samvel Babayanning maslahatlari bugun bizga foyda keltirdi. Ikkinchi bo'limda faolligimiz ortdi, 4 ta qulay imkoniyatga ega bo'ldik. Hozir muhimi, kim asosiy tarkibga munosib, kim zaxirada qolishi kerak, aniqlab oldik. Zaxiradan tushib ham jamoaga katta foyda keltiradigan futbolchilar bo'ladi.

- Avvalgi uchrashuvda ham jamoa so'ngi daqiqalarda gol o'tkazib yuborgandi. Bugun ham shunday bo'ldi. Kelgusida buning oldini olish uchun qanday rejalaringiz bor?

- Xatolar ustida ishlaymiz. Ishtiyoqni yanada oshirish uchun harakat qilamiz. So'nggi daqiqalarda gol o'tkazib yuborish bu - yakuniy natijaning salbiy ko'rinishiga sabab bo'ladi. Biz har doim g'alabani hohlaymiz. Ketma-ket 4 ta o'yinda biz g'alabaga haqli o'yin namoyish etgandik.

- Ivan Yosovich so'ngi o'yinlarda ko'rinmayotganiga izoh bersangiz?

- Yosovich jarohatidan davolash amaliyotini olib borayapti. Maydonga qaytishi uning qanchalik tez tiklanishiga bog'liq.