Futzal. Xose Mariya Mendez: "Biz zo'rmiz deb o'ylamasligimiz kerak"

Uchrashuvdan keyin yoshlarimiz bosh murabbiyi Xose Mariya Pazos Mendez fikrlarini bildirib o'tdi.

- Bugungi o'yinga biroz og'irroq kirishdik. O'yinni "uxlab" boshladik. Ikkinchi golni urganimizdan keyin bo'shashdik. Biz zo'rmiz deb o'ylamasligimiz kerak. Guruhda yana ikkita o'yin bor. Aynan ana shu o'yinlarda bizning darajamiz malum bo'ladi. CHunki, keyingi raqiblarimiz kuchliroq.

Biz uchun yomon tomoni, ertaga himoyachimiz Botir Rizaev o'ynamaydi. Livan tarkibida gavdali o'yinchilar bor va ularga qarshi Botirga o'xshagan himoyachilar kerak bizga. Mayli, ertaga g'alaba uchun o'ynaymiz.

- Tashqaridagi juda ham issiq havo yigitlarning o'yiniga tasir qilyaptimi?
- Arenaning ichida kondicioner o'rnatilgani uchun tashqaridagi issiq ichkarida unchalik bilinmaydi. Lekin, namlik bilinadi. Bu noqulaylik hamma uchun bir xil. SHuning uchun ham bu o'zini oqlashga sabab bo'lolmaydi.

- Bizning ertangi raqibimizda juda ham gavdali o'yinchilar ko'p ekan, ular 20 yoshga ham o'xshashmaydi. Livanga qarshi maxsus taktika qo'llaysizmi?
- Yo'q, biz odatdagidek jamoaviy o'yin namoyish etamiz. To'g'ri, ular individual kuchli. Lekin, biz jamoaviy jihatdan yaxshiroqmiz. Jamoa bo'lib o'zimizni kuchli ekanligimizni ko'rsatamiz. Ertaga yanada kuchliroq ekanligimizni namoyish eta olishimiz kerak.


Abdurahmon Fozilov
Bangkok, Tailand