Futzal. Oliy liganing yangi mavsumiga qura tashlash sanasi malum bo'ldi

Avval xabar berilganidek, 30 avgust kuni “Yunusobod sport majmuasi” AGMK va “Jizzax Kenteks” o'rtasidagi Superkubok uchrashuviga mezbonlik qiladi. 

O'zPFL mavsumiy reja ishlab chiqishdan oldin futzal termasi ustozi Bahodir Ahmedov rejalari bilan qiziqqandi. Malumki, 27 sentyabr kuni Kuvaytda Osiyo chempionati start oladi. SHundan kelib chiqib, sentyabr oyida ichki chempionatning faqatgina 1 ta tur uchrashuvini o'tkazish uchun imkoniyat bor. Qolgan vaqt davomida asosiy futzalchilar terma jamoa ixtiyorida bo'ladi. 

Rejaga ko'ra, 4-9 sentyabr kunlari chempionatning ilk tur uchrashuvlari Jizzaxda bo'lib o'tadi. Mos ravishda keyingi turlar 18-23 oktyabr (Xorazm), 13-18 noyabr (Toshkent), 1-4 dekabr (Farg'ona), 22-25 dekabr (Olmaliq) ketma-ketligida o'tadi. Bunga qadar O'zPFL boshqa ehtimoliy mezbon shaharlardagi zallarni o'rganadi. Ular talabga javob bersa, 2023 yildan boshlab Qarshi, Samarqand, Buxoro shaharlari ham futzal chempionatini qabul qilishi mumkin. Bu haqda keyinroq batafsil malumot beriladi. 

Oliy liganing 2022/23 yilgi mavsumiga ertaga — 20 avgust kuni qura tashlanadi. Jarayon 11:00 dan boshlab sahifalarimiz orqali jonli efirga uzatiladi. 

Futzal chempionatining yangi mavsumida ham 12 ta jamoa g'oliblik uchun kurash olib boradi. Bular: “Jizzax Kenteks”, AGMK, “Paxtakor”, “Lokomotiv”, “Bunyodkor”, “Nasaf”, “Metallurg”, “Maksam CHirchiq”, “Neftchi”, “Navbahor”, BMB, “Oil star”.