Futzal. “Bunyodkor” mashg'uloti. FOTO+Video

SHuni inobatga olgan holda mini futbol klublarimizning mashg'ulotlarini yoritib borishga harakat qilamiz. Bu borada dastlabki qahramonlarimiz Toshkentning “Bunyodkor” jamoasi azolari bo'lishdi.

Klub mashg'ulotlarni “Bunyodkor” stadioni hududida joylashgan mini futbol zalida olib bormoqda. Mashg'ulotlarda quyidagi o'yinchilar ishtirok etishmoqda: Alisher Xolmuhamedov, Abbos O'lmasbekov, Asomiddin Jaloliddinov, Baxtiyor Umarov, Ulug'bek Abdullaev, Mashrab Odilov, Davron Valijonov, Dilmurod SHavkatov, Abdushukur Yasinov, Laziz Daliev, Alisher Ibragimov, Sardor Jabborov, Umid Qodirov, Azamat Komiljonov.

Avvalgi mavsumda harakat qilganlardan Asqar To'laganov klubni tark etgan, o'tgan mavsumning ikkinchi yarmini “Bunyodkor” safida o'tkazgan Rustam Umarov esa ayni paytda yangi tuzilgan “Olmaliq” jamoasi tarkibida shug'ullanmoqda. Uning transfer huquqi “qaldirg'ochlar”ga tegishli, lekin darvozabon yangi mavsumni katta ehtimol bilan olmaliqliklar tarkibida boshlaydi. Bundan oldingi yillarda jamoaning o'ynovchi murabbiyi sifatida harakat qilib kelgan o'zbek futzalining eng yorqin yulduzlaridan biri Abdulla Bo'riev esa o'yinchilik faoliyatiga yakun yasagan edi. Endi u bor etiborini murabbiylik ishiga qaratishi mumkin. Qolgan o'yinchilar esa saqlab qolingan va ular bu mavsumni ham “Bunyodkor” tarkibida o'tkazishadi. Yangilarga keladigan bo'lsak, yig'inga chaqirilganlardan hozirga kelib faqat bitta o'yinchi olib qolindi, bu - Azamat Komiljonov. U bilan hali shartnoma imzolanmagan, hammasi Associaciya kubogidan so'ng malum bo'ladi.

Mashg'ulotlar jarayoniga kelsak, klub bazasida sport zali mavjudligi bois futzalchilar doimiy tarzda mashg'ulot olib borishmoqda. Biz tashrif buyurganimizda sportchilar engil yugurishni tugatib, chigalyozdi mashqlarini bajarishayotgan edi. Undan keyin to'psiz bir-birlarini quvib etib olishni mashq qilishdi, keyin esa gandbol o'ynaldi. Qo'l bilan o'ynalgan o'yindan keyin esa yigitlarning to'p bilan texnikasini oshiruvchi mashqlar berildi. Mashg'ulot jarayonining so'nggida esa odatiy tarzda ikkiga bo'linib o'zaro bellashishdi.

Bir so'z bilan aytganda “Bunyodkor”ning yangi mavsumga tayyorgarlik jarayoni ko'ngildagidek davom etmoqda, klub oldiga esa bu mavsumda uchtalikka kirish vazifa qilib qo'yilgan.

Quyida "Bunyodkor" mashg'ulotidan fotogalereya va videoni tomosha qilishingiz mumkin.

P.S. “Bunyodkor” oxirgi mavsumda chempionat bronza medallari uchun “Turon-S” bilan bahsning yakunlanishiga 6 soniya qolganda g'alabani  qo'ldan chiqarishgan edi. Yangi mavsumda ularga omad tilab qolamiz.


sifatli turi


mobil turi


Tolibjon Qosimov
operator: Zoir Tursunboev