Futzal bo'yicha O'zbekiston ayollar terma jamoasi Osiyo Kubogiga jo'nab ketdi

Bugun tunda terma jamoamiz delegaciyasi Osiyo kubogi final bosqichida ishtirok etish uchun Xitoy Xalq Respublikasiga uchib ketdi. Uchinchi bor tashkil etilayotgan qita chempionatida 12 ta jamoa g'oliblik uchun parketga chiqadi. Farrux Zokirov boshchiligidagi O'zbekiston terma jamoasi qizlari «A» guruhida mezbonlar – Xitoy, shuningdek, Xitoy Taypeyi hamda Avstraliya terma jamoalariga qarshi bahs olib borishadi.

6 may kuni Hohhot shahrida start oladigan Osiyo kubogi musobaqasi 17 may sanasiga qadar davom etadi. Bundan oldingi qita kubogi bahslari 2015 yili Malayziya, 2018 yili Tailand mamlakatlarida tashkil etilgandi. 

Avvalgi Osiyo kubogi finallarida Eron Islom Respublikasi hamda Yaponiya ayollar terma jamoalari kuch sinashishgan va har ikkala finalda fors futzalchilarining qo'li baland kelgan. Ikkala chempionatda ham bronza medalini Tailand terma jamoasi begona qilmagan. 2015 yili tailandliklar 3-o'rin uchun kurashda musobaqa mezbonlari — Malayziya terma jamoasini yirik hisobda mag'lubiyatga uchratgan bo'lsa, oradan uchi yil o'tib tayliklar endi o'z uylarida Vetnam terma jamoasini o'yindan keyingi penaltilar ceriyasida dog'da qoldirgan. 

O'zbekiston terma jamoasi Osiyo kubogining doimiy ishtirokchilaridan biri sanaladi. qizlarimiz 2015 yilgi qita birinchiligida gonkong bilan durang o'ynab, Malayziya hamda Eronga imkoniyatni boy berib qo'ygan va guruhda so'nggi o'rinni egallagan. 2018 yilgi qita chempionatida esa qizlarimiz «D» guruhida Turkmaniston ustidan g'alaba qozonib, Eronga yutqazgan bo'lsada, pley-off yo'llanmasini qo'lga kiritgan. 

Chorak finalda qizlarimiz kunchiqar yurt vakillari – Yaponiya ter ajamoasiga yutqazib qo'ygach, musobaqada ishtirokini to'xtatgan. Bu gal O'zbekiston terma jamoasi qita chempionatiga uchinchi marta yo'l olayapti. Farrux Zokirov boshchiligidagi murabbiylar shtabi Osiyo kubogiga optimal tarkibni olib ketayapti deb bo'lmaydi. Mamlakatimizning bir qator iqtidorli qizlari katta futbol musobaqasida O'zbekiston terma jamoasiga chaqiruv olganligi bois, futzal chempionatiga qo'yib yuborilmadi. Шunday bo'lsada, biz O'zbekiston ayollar terma jamoasidan Osiyo chempionatida muvaffaqiyatli ishtirokni kutib qolamiz.