Fevzi Davletov: "Surxon" keyingi mavsumda Termizga qaytadi. "Neftchi" bugun yaxshi himoyalandi"

"Bugun g'alaba qozona olganimizda, sovrinli o'rinlar uchun kurashish imkoniyatimiz qolar edi. Natija esa bunday bo'lmadi. Durang adolatli natija bo'ldi. Bunday bahslarda ko'p vaziyatlarga ega bo'lmasligingiz mumkin. "Neftchi" bugun yaxshi himoyalandi", - dedi Fevzi Rizaevich bugungi o'yin haqida.

- "Surxon" jamoasidagi natijalar ancha barqaror bo'lib qoldi. O'tgan mavsum jamoa 6-o'rinni egallagandi. Joriy mavsum esa jamoa 7-o'rinni egallab turibdi. Homiylar klubning faoliyatiga qanchalik qiziqish bildirmoqda? Homiylar jamoa natijasidan qanchalik qoniqmoqda?

- Rahbariyat har doim biz bilan aloqada. Kecha ham telefon orqali bog'langan edik. Bugun ham telefon qilishdi. O'tgan mavsumda oltinchi o'rinda edik. Joriy mavsum esa natijamizni yanada yaxshilab olishimiz kerak edi. Samarqanddagi so'nggi uchrashuvlarda ko'p narcha yo'qotdik. Umumiy qilib aytsak, jamoa rivojlanishda davom etmoqda. Ayrim bir bahslarda hujumda yaxshi o'ynay olmadik. Esingizda bo'lsa, bir vaqt muqaddam bizning hujumchimiz qizil kartochka tufayli chetlatilgandi. O'shanda biroz muammolarga duch kelgandik.

- Men klubning bosh homiysi Baxtiyor Fozilovni nazarda tutgandim. U inson futbolga qanchalik qiziqadi? "Surxon" jamoasi aynan Samarqandda o'ynayotgani shu bilan bog'liqmi?

- Yo'q. Bizning stadionimizda rekonstrukciya ishlari olib borilmoqda, shu sababli biz bu erdamiz. Umid qilamanki, keyingi mavsumda jamoamiz to'liq Termizda tayyorgarlik olib boradi. Bosh homiyimiz futbolga qiziqishi katta ekanligini bilamiz. Bizga ishonch bildirishmoqda.

- "Surxon" jamoasi mavsumning ikkinchi qismini Samarqandda o'tkazgani Baxtiyor Fozilov bilan bog'liq emasmi?

- Yo'q. Bu masala bilan PFL shug'ullanadi-ku. Bizda boshqa stadion yo'q edi. SHu sababli biz shu erga ko'chdik.

- Demak jamoa bosh homiysi "Surxon"ning ettinchi o'rinda ekanligidan qoniqmoqdami?

- Ha. Natijadan rahbariyat rozi.

- "Surxon" qachon Termizga qachon qaytadi?

- Keyingi mavsumda. Biz faqatgina Kubokda yaxshi ishtirok eta olmadik deb o'ylayman. Sababi finalga chiqish uchun juda yaxshi imkoniyatlarga ega edik.

- Superliga yakunlanishiga qadar ikkita bahs qoldi. Natijalardan qanchalik qoniqyapsiz?

- Muvaffaqiyatsiz o'yinlar ham bo'ldi, albatta. Biz qiyin jarayonlardan o'tdik. Jamoa o'z oldiga qo'ygan maqsadi bor. O'z o'yinimizni yanada yaxshilashga intilishimiz kerak.

- "Surxon" jamoasida moliyaviy muammolar bor degan xabarlar tarqaldi. Klubda bir necha oydan beri maoshlar berilmayotganmish? Bu rostmi?

- Bu darajada katta muammolar yo'q. Barchasi yaxshi. Hozirgi kunda so'nggi oydagi mablag'larimizni to'lab berishlari kerak, xolos.