Farhod Bekmurodov: “Andijon”ni oliy ligada qolishiga ko'pchilik ishonmagandi”

“Burgutlar” kecha o'z maydonida “Dinamo”ni qabul qilib 1:1 hisobida durang qayd etdi. Mezbonlarning goliga mualliflik qilgan Farhod Bekmurodov uchrashuvdan so'ng o'z fikrlarini bildirib o'tdi. Darvoqe, mazkur futbolchi bu yil 21 yoshga to'ldi. Joriy mavsum oliy ligada debyutini nishonladi.

- O'yin haqida nima deyish mumkin. Garchi bugun g'alaba qozona olmagan bo'lsakda, asosiysi o'z oldimizga qo'yilgan vazifani uddaladik. Bundan juda xursandmiz. Ochig'i, ko'pchilik “Andijon”ning oliy ligada qolishiga ishonmagandi. Ammo biz maqsad sari astoydil kurashdik.

- Taqdirni qarangki, birinchi davrada aynan samarqandliklarga qarshi kechgan bahsda oliy ligadagi debyutimni o'tkazgandim. Elitadagi ilk golimni ham aynan “Dinamo” jamoasiga kiritdim.

- Zaxiradan maydonga tushayotganimda murabbiylar o'ng qanot yarim himoyasida xarakat qilishimni aytdi. Bungacha maydon markazida o'ynab kelganim uchunmi yoki boshqa sababmi boshida o'yinga kirishib ketishim qiyinroq kechdi. Ammo keyinchalik markazroqqa o'tib o'ynadim. Golimga kelsak, Anvar aka Berdiev havodagi kurashda to'pni menga yutib berdi va bundan unumli foydalanib qoldim.

- Endi kelgusi mavsumdan umidim katta. Asosiy tarkibga kirish uchun bor kuchim bilan xarakat qilaman va bu orqali olimpiya terma jamoasidan ham taklif olishga intilaman.

Islombek Rustambekov.