Farg'onada “Neftchi” yoshlar jamoasiga saralash ketmoqda

Avval xabar berganimizdek, rahbariyat va murabbiylar shtabi tatilga chiqmadi aksincha yangi mavsum rejalarini ishlab chiqmoqda. Ular “Neftchi”ning yangi o'yin-uslubini yaratmoqdalar. Bu borada murabbiylar ilk qadamni yoshlardan boshlamoqchi. Andrey Fyodorov va uning yordamchilari o'quv-yig'in mashg'ulotini qay tariqa o'tkazish, transfer oynasida qanday o'zgarishlar qilish borasida o'ylab, shu haqda ish rejalarni ham joriy etishmoqda.

SHuningdek murabbiylar jamoaning ertangi kuni bo'lmish yoshlar klubiga ham jiddiy etibor qaratib kelmoqda. Bugungi kunda oliy liganing ko'plab klublarida ochig'ini aytish kerak, o'rinbosarlarning qachon yig'ilib, qaerda yig'in o'tkazishi nomalum bo'lib turibdi. Ammo farg'onaliklar mavsum-2016da yoshlar jamoasini yanada yoshartirish va shu bilan birga munosib o'yinchilarni yig'ish maqsadida o'tgan oyning so'nggi kunlaridan boshlab, saralash bosqichini o'tkazib kelmoqda.

Yil davomida ikkinchi liga va futbol maktabalari o'tasida o'tkazib kelingan musobaqalarni kuzatib borgan “Neftchi” murabbiylari o'sha paytda etiborini tortgan futbolchilarni mana bugungi kunga kelib, saralash bosqichiga taklif etgan. Asosan 1997 yil va undan kichik yoshda bo'lgan yigitlar bugungi kunda “Neftchi” yoshlar jamoasiga o'tish uchun astoydil ter to'kmoqda.

Futbolchilar bilan shaxsan Murod Ismoilovning o'zi mashg'ulot o'tkazmoqda. O'z vaqtida “Paxtakor”dagi faoliyati orqali yoshlar bilan ishlash xadisini olgan Murod Muzaffarovich bugungi kunga kelib, “Neftchi”da ham mahalliy yoshlarga jiddiy etibor qaratmoqda va jamoaning ertangi kuniga o'ziga xos zamin yaratmoqda deyish mumkin. SHuningdek saralash bosqichida yoshlar jamoasi ustozi Bahrom Haydarov va darvozabonlar murabbiyi Bahodir SHamsiddinov ham bevosita ishtirok etib, yoshlarni ko'zdan kechirmoqda.

Eslatib o'tamiz “Neftchi” yoshlar jamoasi yanvar oyining beshinchi kunidan o'z qarorgohida yig'ilib, dastlabki o'quv-yig'in mashg'ulotlariga kirishishadi.