Evropada ham bizning uslubga murojaat etishmoqda… La liganing 2-tur sharhi
26 avg 2019 15:22
Yangiliklar

Evropada ham bizning uslubga murojaat etishmoqda… La liganing 2-tur sharhi

Ispaniya chempionati bu gal har galgidan ko'ra qiziqroq start oldi.

Birinchi turda «Barselona» mag'lubiyatga uchragan bo'lsa, ikkinchi turda Madridning «Real»i ham ochko yo'qotishga majbur bo'ldi. Hozir mazkur uchrashuvlar orasidan eng qiziqarlilari haqida qisqacha fikr yuritamiz.

«Sevilya» va «Atletiko» turnir peshqadamiga aylanib olishdi. Bir paytlar hozirgi Ispaniya hududlari Arab xalifaligi tarkibiga kirgani haqida xabaringiz bor. O'sha davrlarda Ishbiliya va G'arnota shaharlari ispan madaniyatining eng oldi shaharlari hisoblanishgan. Asrlar davomida bu nomlar etimologik jihatdan o'zgarishga uchrab, bugungi ispan tili mezonlariga ko'ra «Granada» va «Sevilya» shaklida talaffuz qilinadi. Ammo, mazkur provinciyada hali-hamon arablarning ko'plab topilishi bilan Baskoniya, Kataloniya yoki Madriddan farq qiladi. 2-turda mazkur ikki shaharning bosh jamoalari to'qnashuviga guvoh bo'ldik. Uchrashuv deyarli teng kurashlar ostida o'tdi. Hatto, «Granada» futbolchilari darvoza tomon ko'proq zarbalar ham berishdi. Ammo, bir xunuk holat: «darvoza tomon» o'rin holi nega ajratib yozildi? CHunki, uchrashuv mobaynida «Granada» futbolchilari aynan darvoza tomonga 12 bor zarba yo'llashdi. Eng qizig'i, bu zarbalarning hammasi yo darvozaning yonidan, yoki yuqorisidan o'tib ketdi. Tarkibida Roberto Soldadodek «bozor ko'rgan» hujumchisi bor jamoaning bunaqa noaniqlik ko'rsatishi biroz kulguni qo'zg'aydigan holat. «Granada» bosh murabbiyi Diego Martinez mashg'ulotlarda shogirdlariga ulkan darvozani to'g'ri nishonga olishni o'rgatmasa, raqib darvozabonlari zerikib qolishlari mumkin. Biz bu holatga nega urg'u berdik? Mazkur bahsdan keyin APL doirasida «Everton» «Aston Villa»ga mag'lub bo'lgan uchrashuvda ham shunga o'xshash holat yuzaga keldi. SHuning uchun, «Granada»da asosan arablar yashashi haqida ham gapirdik. Ular Osiyo futbolidan andoza olishmoqda. Yana kimdan deng, bizning futboldan. Kulyapsizmi? Yo'q, shoshilmang. Axir, bir necha yil oldin Osiyoda yangicha futbol uslubini yaratish ilinjida yurtimizning «eng kuchli» yigitlari bilan Eron milliy terma jamoasi darvozasiga birorta ham aniq zarba yo'llamaganimiz (yo'llay olmagan emas, uslub talablaridan kelib chiqib yo'llamagan deylik) uchrashuvlarni esladingizmi. Ular aynan o'sha uslubning mohiyatini anglab etib, buni Evropaga tadbiq etmoqdalar…

(Tarixga etibor berilmasligi mumkin, ammo bu tarix barchaning yodidan chiqqanini anglatmaydi. Yani, biz ispan tarixidagi Arab xalifaligining mustamlakachilik davri tarixini nazarda tutyapmiz... )

Yuqorida yomon damlarni eslatib yuborgan bo'lsak, uzr! Aytmoqchimizki, shunday holat APL-u La liga jamoalari bilan ham yuz berishi mumkin ekan. Buni shunchaki omadsizlikka yo'yib qo'ya qolaylik. Qo'limizdan ortiq nima ham kelardi…

Xullas, bizning uslubga murojaat etgan (shu jumlalarni faxr va iftixor bilan aytamiz, kim biladi yana qachon bunday deyish nasib etarkin) «Granada» yakunda bu noto'g'ri qaror bo'lganini tushundi va minimal hisobda imkoniyatni boy berdi. «Sevilya» esa bu g'alabadan keyin turnir jadvalida «Atletiko» bilan birgalikda karvonboshilikni qo'lga oldi. O'tgan mavsumda ham mazkur klub startni yaxshi olgan, ammo ikkinchi davrada muvozanatni yo'qotgandi. Bu gal ko'ramiz, La ligada doimiy etakchilik qiladigan trioni kvartetga aylantira olarmikan?

Madridning «Atletiko»si esa «Leganes» maydonida mehmon bo'lib, Vitolining goli evaziga g'alaba qozondi. Mazkur bahs ko'rsatdiki, «matraschilar» jamoasida har qanday yulduzdan ko'ra murabbiyning imzosi ustunroq turadi. Yangilangan «Atletiko» ham oldingisidek minimal hisobda g'alaba qozonmoqda. Etiborlisi, jamoani etakchilar tark etishi klubga zarracha tasir ko'rsatmagan. Godin-u, Xuanfranlarsiz mudofaa chizig'i ham quruq o'yin o'tkazish mumkin ekan.

Leganes

LaLiga . 2-tur

25/08/2019, 22:00

Tugadi

Atletico Madrid

Vitolo - 71'

Stadion: Estadio Butarque, 11742 tomoshabin

Bosh hakam: Ricardo De Burgos

45'

90'

Match-senterda ochish

«Real» «Barselona»dan uzoqlashishni xohlamaydi, shekilli. Mamlakat ichidagi etakchilik «Barselona»ning joniga tekkan chog'i, jamoa birinchi turdan keyin boshqa raqobatchilariga ajoyib imkon taqdim etgandi. CHempionatni «Barselona»dan 3 ochkolik farq bilan oldinda boshlash mavsum o'rtasiga borib asqotib qolishi mumkin, albatta. Bundan «Sevilya» va «Atletiko» to'g'ri foydalanmoqda. Endi ular «Barselona»dan 3 ochko, qo'shimchasiga «Real»danam 2 ochkoga o'zib ketishdi. CHunki, Zidan shogirdlari «Santyago Barnabeu»da «Valyadolid» darvozasiga 22 ta zarba berib ham g'alabaga erishishni uddalay olishmadi. Bu ketishda «Qirollik klubi» yana bir muvaffaqiyatsiz mavsum o'tkazishi mumkin. Real etakchisi bo'lish uchun jamoaga tashrif buyurgan Eden Azar maydonga qaytgach, jamoa o'yinini kuzatib bu boradagi so'ngi xulosalarni berishimiz mumkin. Malumotlarga qaraganda, Eden keyingi turda maydonga tushish imkoniyatiga ega bo'ladi.

Real Madrid

Karim Benzema - 82'

LaLiga . 2-tur

24/08/2019, 22:00

Tugadi

Real Valladolid

Sergi Guardiola - 89'

Stadion: Estadio Santiago Bernabeu, 62444 tomoshabin

Bosh hakam: Pablo Gonzalez

45'

90'

Match-senterda ochish

«Valensiya»dan yana yomon start. «Ko'rshapalaklar»ning ishlari bu mavsum ham yurishmayapti. Jamoa Vigoning «Selta» klubiga minimal hisobda mag'lub bo'ldi. Ortda qolgan ikki turdan keyin «Valensiya» 1 ochko to'plagani holda autsayderlar zonasidan o'ziga issiqqina joy tayyorlatib oldi. Jamoaning yurtimizdagi kam sonli muxlislariga sabr, jamoaga esa omad tilashdan boshqa chora topolmadik.

Celta Vigo

Gabriel Fernandez - 15'

LaLiga . 2-tur

25/08/2019, 00:00

Tugadi

Valencia

Stadion: Abanca Balaidos, 20065 tomoshabin

Bosh hakam: Alejandro Hernandez

45'

90'

Match-senterda ochish

Ernesto Valverde «yomon Barsa»ni o'chirib, «yaxshi Barsa» mexanizmini ishga tushirdi. Birinchi turdagi mag'lubiyati katta muhokamalarga sabab bo'lgan «Barselona» «Betis»ga qarshi uchrashuv boshida ham o'z muxlislarini xavotirga solib qo'ydi. Boisi, Nabil Fekir 15-daqiqada o'z jamoasini hisobda oldinga olib chiqishni uddaladi. Ammo, keyinchalik Antuan Grizmann Kataloniyaga ko'rgazmali chiqishlar uchun olib kelinmaganini anglab etdi. Dastlab, tanaffusga qadar hisobni tenglashtirgan francuz ikkinchi taym avvalida «ko'k-anor ranglilar»ni hisobda oldinga ham olib chiqdi. Qolgani «Barselona» uchun muvaffaqiyatli davom etdi. Uchrashuvda Grizmann tomonidan kiritilgan dastlabki ikki golga Serxi Roberto tomonidan samarali uzatma amalga oshirilganini inobatga olsak, Roberto mavsum davomida o'zini qayta kashf etishi mumkin. Zero, unda «La masiya»ning barcha bitiruvchilari singari o'yinni o'qiy olish, maydonni ko'ra bilish va super aniqlikdagi to'p uzatishlari bor. Balki, futbolchi Xavi yoki Inesta darajasiga chiqa olmas, ammo yangi «Roberto» darajasiga asos solishi mumkin. O'yinga qaytadigan bo'lsak, alaloqibat, «Barselona» 5:2 hisobidagi g'alabaga erishib, mavsumdagi dastlabki ochkolarni ishlab oldi.

Barcelona

Antoine Griezmann - 41', Antoine Griezmann - 50', Carles Perez - 56', Jordi Alba - 60', Arturo Vidal - 77'

LaLiga . 2-tur

26/08/2019, 00:00

Tugadi

Real Betis

Nabil Fekir - 15', Loren Moron - 79'

Stadion: Camp Nou, 79160 tomoshabin

Bosh hakam: Jose Luis Gonzalez

45'

90'

Match-senterda ochish

Bundan tashqari, «Levante» o'z maydonida «Vilyarreal»ni mag'lub etdi (2:1). Birinchi turda amaldagi chempionni mag'lub etgan bilbaoliklar «Xetafe» maydonidan durang bilan ortga qaytishdi (1:1). «Osasuna» «Eybar» bilan «Alaves» esa «Espanol» bilan nursiz durang qayd etishdi.

SHuningdek, «Malorka» «Real Sosedad» bahsida bir paytlar «Real»ning kelajagi deya taxmin qilingan Martin Edegorning yagona goli o'yin taqdirini hal qildi.

Quyida to'purarlar ro'yxati bilan tanishing:
Karim Benzema (Real Madrid) - 2
L.Moron (Real Betis) - 2
S.Gvardiola (Real Valyadolid) - 2
A.Grizmann (Barselona) - 2
R.Marti (Levante) - 2
J.Moreno (Vilyarreal) - 2.

Hozircha hammualliflar ro'yxatini «Atletik» himoyachisi Ander Kapa va Serxi Robertolar 2 tadan samarali uzatma bilan boshqarib turibdilar.

Tobora qiziqarli tus olayotgan La liga bahslari, ularning atrofidagi va ichidagi etiborga molik voqealar va ularning sharhini bizning saytda kuzatib boring. championat.asia sizni faqat sifatli materiallar bilan taminlaydi.

Faxriddin Ro'ziev

Havola :

Manba : championat.asia

Yangiliklarni Telegramda o'qing!

Reyting: +9