Evropa chempionatlari tarixi: Evro-1980
25 may 2016 12:11
Yangiliklar

Evropa chempionatlari tarixi: Evro-1980

"Ko'hna qita" chempionatlari tarixi bilan tanishtirishda davom etamiz.

6-Evropa chempionati 1980 yilning 11-22 iyun kunlari Italiya maydonlarida bo'lib o'tgan. O'tgan chempionatlardan farqli ravishda o'sha turnirda ilk marotaba final bosqichida 8 ta terma jamoa ishtirok etgan. Bundan tashqari ilk marotaba mezbon mamlakat saralash o'yinlarisiz final bosqichiga yo'llanma olgan.

Musobaqaning o'zi ham boshqacha formatda o'tkazila boshlangan: 8 ta terma jamoa 4 tadan ikkita guruhga bo'lingan. Birinchi o'rin egalari finalda, ikkinchi o'rinni qo'lga kiritgan terma jamoalar esa bronza medali uchun kurashda to'qnash kelganlar.

Umumiy qilib aytadigan bo'lsak, ushbu turnir Evropa chempionatlari tarixida eng zerikarlilaridan biri sifatida yodda qolgan. Jamoalar ehtiyotkorliklari, kam sonli muxlislar va tribunalardagi tartibsizliklar bunga misol.

"A" guruhida GFR, CHexoslovakiya, Gollandiya va Greciya terma jamoalari o'rin olgan guruhdan GFR va CHexoslovakiya terma jamoalari mos ravishda birinchi va ikkinchi o'rinni egallaganlar.
"B" guruhida esa Belgiya, Italiya, Angliya, Ispaniya terma jamoalaridan dastlabki ikkitasi birinchi va ikkinchi o'rinni qo'lga kiritganlar.

SHu tariqa uchinchi o'rin uchun bo'lib o'tgan o'yinda CHexoslovakiya hamda Italiya terma jamoalari asosiy vaqtda 1:1 hisobini qayd etganlar. Penaltilar seriyasida esa omad CHexoslovakiya terma jamoasiga kulib boqqan va aynan ular chempionatning bronza medallarini qo'lga kiritganlar.

Finalda esa GFR Belgiyani 2:1 hisobida mag'lubiyatga uchratib, Evro-1980 g'olibiga aylangan.