Etiborsiz qolgan Rustam Akramov

Bizga malum bo'lishicha, futbol professori Rustam Akramovich Akramov yotoqdan tura olmaydigan holga kelib qolgan. U kishi 2015 yil Avstraliyada bo'lib o'tgan Osiyo Kubogidan keyin ruhan siqilish holatiga tushib, hatto insultni boshdan o'tkazdi. Insult bu - bosh miya qon aylanishining kritik buzilishi bo'lib, odam es-hushini yo'qota boshlaydi. 

Buning natijasida hatto boshqalarni tanimaydigan darajaga kelib qoladi. Rustam Akramovda shunday hol kuzatildi. U kishi harakatsiz holatga kelib qoldi, yurishi qiyinlashdi, o'rnidan tursa ham juda sekin qadam tashlab yura boshladi, hozirgi paytda esa yotoqqa mixlanib qolgan. 

Bizgacha etib kelgan malumotga ko'ra, futbol professoridan bugungi kunda faqat u kishining qizi xabar olib turibdi. Rustam Akramovichni kimdir yaxshi ko'radi, kimdir yomon ko'radi, lekin xohlaymizmi-yo'qmi, u kishi o'zbek futboli uchun ko'p hissa qo'shgan mutaxassislardan. 

Afsuski, futbolimizdagi eng yomon illatlardan biri - yoshi o'tganlarni keraksiz buyumdek o'z holiga tashlab, ular holidan xabar olmaslik. Balki O'FA Rustamov Akramov ahvolidan xabar olib turgandir, lekin bu haqda aniq gap aytish qiyin. Har holda u kishini juda nochor holatda deb eshitdik. 

Faxriylar holidan xabar olish avvalo O'FA zimmasidagi ish hisoblanadi. Bugun yaxshi ishlab turgan kadr, ertaga mazasi qochib hech narsaga yaramay qolishi mumkin. Qolaversa, vaqt - shafqatsiz hakam, hammamiz erta-indin qariymiz, kimdir to'shakka mixlanib qolishi mumkin, mana shu payt hech kimga keraksiz bo'lib qolishdan O'ZI asrasin.