Ertaga Igor SHkvirin "Dnepr" safida maydonga tushadi

19 aprel kuni Dnepr shahridagi "Meteor" stadionida ukrainalik sobiq futbolchi, Olimpiada chempioni Vadim Tishenkoning xotira o'yini bo'lib o'tadi. O'tgan yil vafot etgan Tishenkoning do'stlari yig'ilib xayriya uchrashuvi o'tkazishadi. Unda "Dnepr" klubining 1980 yillardagi tarkibi 1990-2000 yillardagi tarkibiga qarshi maydonga tushadi. Bundan tashqari sobiq futbolchi sharafiga yasalgan maxsus haykalning ham ochilish marosimi bo'lib o'tadi.

Ertangi bahsda Dnepr safida turli yillarda o'ynagan Sergey Krakovskiy, Valeriy Gorodov, Oleg Taran, Aleksey CHerednik, Evgeniy SHaxov, Aleksandr Rikun, Andrey Polunin, Yuriy Maksimov, Oleg SHelaev, Sergey Konovalov, Valentin Moskvin, Sergey Nazarenko, Ruslan Rotan va Igor SHkvirin kabi futbolchilar ishtirok etishadi.

Bundan tashqari boshqa klublarda o'ynagan Aleksey Mixaylichenko, Vladimir Bessonov, Oleg Kuznecov, Vasiliy Rac va Gennadiy Orbu kabi o'yinchilar ham bahsga taklif etilishgan.

Malumot uchun, Igor SHkvirin Vadim Tishenko bilan qalin do'st bo'lgan. 1986 yilda SHkvirin va Tishenko Lvovning "SKA Karpati" klubida o'ynashgan. 1988 yilda esa ikkala futbolchi birgalikda "Dnepr" safida Sobiq Ittifoq chempioni bo'lishgandi.