Ertaga 1-liga bor. Hakamlar qani?

Ertaga birinchi liganing 2-bosqichidan o'rin olgan 9-tur bellashuvlari o'tkaziladi. Navbatdagi turning barcha sakkizta o'yini bir kunga belgilangan. Ammo-lekin PFL rasmiy saytida 9-tur o'yinlarini boshqarib boradigan hakamlar brigadasi haliyam elon qilingani yo'q. Albatta, biz – hamkasblarmiz, shunday ekan, birovdan kamchilik axtarish niyatimiz yo'q. Lekin tur hakamlarini vaqtida berib borish ularning vazifasi ekanligini bir og'iz eslatib o'tish zarar qilmas. 

Bundan o'n kuncha oldin ish yuzasidan federaciya binosiga borganimda hakamlar va nazoratchilar bo'limida ishlab kelayotgan Bobur Haydarov bilan gaplashib qoldik. U kishidan nega hakamlar ro'yxati vaqtida matbuotga berilmayapti deb so'raganimda, o'yinlarni boshqarishi kerak bo'lgan hakamlar ro'yxati har doim tayyor turishi, faqat PFL matbuot xizmatidan hech kim kelib so'ramayotgani uchun vaqtida saytlarda chiqmayotganini aytdi. Ertaga 1-ligada o'yinlar borligi malum. Ammo hakamlar haliyam elon qilinmadi. Buning sababi esa bizga qorong'u. Ehtimol, bu shanba-yakshanba kunlari PFLning ishlamasligi bilan bog'liqdir. Mana endi ertaga saytda chiqsa kerak, tur hakamlari bugun falonchi o'yinlarni boshqarishadi deb.

Hakamlarni vaqtliroq elon qilinishi nima beradi? Masalan, viloyat klublari kelayotgan hakamlarga oldindan poezd yo samolyotga chipta olib qo'yishlari lozim, bundan tashqari, hakamlarning qaerdan ekanligiga qarab qaytib ketish uchun yo'lkira xarajatlarini ham taxlab qo'yishga to'g'ri keladi. Ammo “qora liboslilar” nomi elon qilinmasa aksariyat klublar nima qilishni bilmay hayron qolishadi va o'yinga bir-ikki kun qolganda shoshib qolishyapti. SHunday ekan, PFL birovlardan professionallikni talab qilguncha avvalo o'zi boshqalarga o'rnak bo'lsa ayni muddao bo'lardi.

Xayrulla XOLIQOV.