Eron bilan o'yinga 10 kun qoldi. Tehrondagi g'alaba esingizdami?

JCH-2014 saralash bosqichidan o'rin olgan o'sha o'yinda ikkala jamoaga ham g'alaba zarur edi. Eron yutganida 90 foizga JCH yo'llanmasini hal qilar, biz g'alaba qozonsak guruhda birinchi o'ringa chiqib Janubiy Koreya bilan o'yinni kutardik.

Bu o'yin biz uchun Tehrondagi birinchi uchrashuv bo'lib, 1:0 hisobida g'alaba qozonganmiz. O'yindagi yagona gol 71-daqiqada Ulug'bek Baqoev tomonidan kiritilgandi.

Gol qanday bo'lgandi? Terma jamoamiz vakillari jarima to'pi tepish imkoniga ega bo'lishadi. To'p yoniga Server Jeparov yaqinlashadi va to'pni havolatib jarima maydonchasi ichiga uzatib beradi. SHunda Ulug'bek Baqoev hammadan birinchi to'pga etib kelib chap oyoqda bexato zarba yo'llaydi - GOL!!!

Yakunda mana shu birgina vaziyat o'yin taqdirini hal qiladi va O'zbekiston terma jamoasi o'z tarixida ilk bor Eronni mag'lub etadi. Mirjalol Qosimov shogirdlari Tehrondan o'ta muhim uch ochko bilan qaytishadi.

Keling, o'sha o'yindagi tarkibni yodga olamiz. Darvozani Ignatiy Netserov qo'riqlagandi. Himoyachilar - chap qanotdan boshlab Vitaliy Denisov, Artyom Filiposyan, Islom To'xtaxo'jaev, Akmal SHorahmedov. Yarim himoyachilar - Aziz Haydarov, Server Jeparov, Sanjar Tursunov, Fozil Musaev, SHoxruh Gadoev. Hujumda esa Ulug'bek Baqoev harakat qilgandi.

Zaxiradan tushgan futbolchilar: Oleg Zoteev, Aleksandr Geynrix, Islom Inomov.

Hozir yuqoridagi tarkibdan to'rt nafari Eron - O'zbekiston o'yiniga taklif etilgan. Bular - Ignatiy Nesterov, Aziz Haydarov, Server Jeparov va Aleksandr Geynrix. Uchrashuv qahramoni Ulug'bek Baqoev esa futbolchilik faoliyatini tugatib, bugungi kunda "Buxoro" bosh murabbiyi bo'lib ishlamoqda. Termaga chaqirilganlar orasida Marat Bikmaev, Temurxo'ja Abduxoliqov singari yaxshi hujumchilar bor. SHunday ekan, bugungi tarkibdan ham bemalol g'alaba kutsak bo'ladi.