Ektor Kuper: "Oktyabr oyidagi yig'inda terma jamoaga umuman chaqirilmagan futbolchilar ham bo'ladi"

- Birinchi navbatda ikkita turli xil taymlar guvohiga aylandik. SHuni unutmaslik kerakki raqib anoyilardan emasdi. Ikkinchi taymda charchoq alomatlari sezildi. Balki bunda mening aybim bordir, mashg'ulotlar vaqtida jismoniy tayyorgarlikka ko'proq etibor bermagandirmiz. Himoya chizig'i bugun oldingi bahsa nisbatan yaxshiroq o'ynadi. Hujumda esa hali qiladigan ishlarimiz ko'p. Eron ham ko'p hujum qildi demagan bo'lardim. To'g'ri natija bo'lmadi, ammo o'rtoqlik uchrashuvi bo'lgani uchun yangi futbolchilarni tushirib ularni sinab ko'rishga qaror qildim. Ikkita o'yin orqali xulosa qilib aytadigan bo'lsam qaysi poziciyani kuchaytirishim kerakligini bilib oldim. Keyingi yig'inga yangi futbolchilar chaqiriladi", - deydi Kuper.

- Sizning uslubingiz himoyaviy. Bunday vaziyatda hujumda imkoniyat kam bo'ladi va o'sha kam imkoniyatdan foydalanish kerak. Hujum chizig'ida uch futbolchi Temurxo'ja Abduxoliqov, Igor Sergeev va Ivan Nagaevem sinab ko'rdingiz. Ular sizning talabingizga javob beradimi yoki yo'qmi?
-  Oldingi matbuot anjumanlarida aytganman. Asosiy urg'uni himoyaga qaratganman. Hujumchilarning soni bilan hujumkorlikni bog'lamagan bo'lardim. Bugun 4 nafar hujumkor o'yinchi harakat qildi. Bugun Osiyoning eng kuchli jamoalardan biriga qarshi o'ynadik. Keyrush 7 yildan buyon ishlamoqda, men esa 14 yoki 15 kundan buyon bu jamoa bilan ishlayapman. Eng asosiysi qaerda xatolar qilganimizni ko'rib oldim. Qaysi o'yinchilar mening talablarimga javob bermayotganini aniqlab olaman. Ikkinchi taymda yomon o'ynadik, bunda mening ham aybim bor.

- Oldinda oktyabr va noyabr oyidagi FIFA kunlari bor. Bundan tashqari Superliga tugaganidan so'ng, taxminan dekabr oyining ikkinchi yarmidan yig'in o'tkazish imkoniyati bor. SHu vaqt sizga Osiyo Kubogiga tayyorgarlik uchun etarli bo'ladimi? Yoki Superligani ertaroq tugatish borasida taklif bilan chiqasizmi?
- Vaqt etarli darajada. O'ylaymanki hech qanday muammo bo'lmaydi. Indinga men O'zbekiston chempionati o'yinlarini kuzatishni boshlayman. Terma jamoani kuchaytirishi mumkin bo'lgan futbolchiarni kuzataman.

- Yaponiya va Janubiy Koreya terma jamoalarining o'zagini yosh futbolchilar tashkil qiladi. Bizning terma jamoada yoshi katta futbolchilar ko'p. Siz yosh futbolchilarga etibor qaratasizmi? 

- Albatta to'g'ri gapni aytdingiz. O'zbekiston U-23 terma jamoasida ko'z ostimga olib qo'ygan futbolchilar bor. Ular terma jamoani kuchaytira olishiga shubham yo'q. Indoneziyadagi musobqada ishtirok etishgani uchun ularni sentyabr oyidagi yig'inga chaqirmadik. Oktyabr oyidagi yig'inda hali terma jamoaga umuman chaqirilmagan o'yinchilar bo'ladi. SHu o'rinda jurnalistlarga rahmat aytmoqchiman. Boshqa davlatda bo'lganida hozirdanoq tanqidiy qarashlar va keskin savollar berishgan bo'lardi. Sabr uchun barchaga rahmat aytaman.